2025 ലെ ഐപിഎല്ലിൽ ഒരു ഇന്ത്യക്കാരന്റെ ഏറ്റവും വേഗതയേറിയ സെഞ്ച്വറി നേടി 14 വയസ്സുള്ള വൈഭവ് സൂര്യവംശി ചരിത്രം സൃഷ്ടിച്ചു, പക്ഷേ രാജസ്ഥാൻ റോയൽസിന്റെ നിലവിലെ ടീമിൽ ഏറ്റവും മികച്ച യുവതാരം വൈഭവ് അല്ല അത് മറ്റൊരു താരം ആണെന്ന് പറയാം. കേൾക്കുമ്പോൾ ഭ്രാന്ത് ആണെന്ന് തോന്നുന്നുണ്ടോ?
കഴിഞ്ഞയാഴ്ച, പരിക്കേറ്റ നിതീഷ് റാണയ്ക്ക് പകരക്കാരനായി ദക്ഷിണാഫ്രിക്കയുടെ കൗമാരക്കാരനായ ലുയാൻ-ഡ്രെ പ്രിട്ടോറിയസിനെ ആർആർ ടീമിലെത്തിച്ചിരുന്നു. ഐപിഎൽ 2025 ലേലത്തിൽ പ്രിട്ടോറിയസ് വന്നെങ്കിലും ആരും അദ്ദേഹത്തെ ടീമിൽ എടുത്തിരുന്നില്ല. പക്ഷേ 2025 ലെ എസ്എ 20 എഡിഷനിൽ അദ്ദേഹം ശ്രദ്ധയാകർഷിച്ചു, അവിടെ അദ്ദേഹം 397 റൺസുമായി സീസണിലെ ഏറ്റവും ഉയർന്ന റൺസ് നേടിയ കളിക്കാരൻ ആയി നിന്നത് മാത്രമല്ല വമ്പൻ ഷോട്ടുകൾ കളിച്ച് എതിരാളികളെ കൊന്ന് കൊലവിളിക്കുക ആണ് ചെയ്തത്.
എന്തായാലും 19 വയസ് മാത്രം ഉള്ള ദക്ഷിണാഫ്രിക്കയുടെ യുവതാരം സ്പിൻ, പേസ് വ്യത്യാസം ഇല്ലാതെ എല്ലാ ബോളർമാരെയും അടിച്ചുപറത്തി. ഔദ്യോഗിക ആർആർ അക്കൗണ്ട് പോസ്റ്റ് ചെയ്ത ഒരു വീഡിയോയിൽ, 19 വയസ്സുകാരന്റെ കരുത്തും റേഞ്ചും കണ്ട് നായകൻ സഞ്ജു സാംസൺ ആർപ്പുവിളിക്കുന്നതും കൂടുതൽ ഷോട്ടുകൾ കളിക്കാനും പറയുന്നത് കാണാം.
വീഡിയോയിൽ സാംസൺ ഒരുപാട് തവണ ” മനോഹര ഷോട്ട്” എന്ന് പറയുന്നത് കേൾക്കാൻ സാധിക്കും. സോഷ്യൽ മീഡിയ ഈ വീഡിയോ ഏറ്റെടുത്തിരിക്കുയാണ്. അതേസമയം ലീഗിൽ പ്ലേ ഓഫ് എത്താതെ പുറത്തായ രാജസ്ഥാൻ ശേഷിക്കുന്ന മത്സരങ്ങൾ മാനം രക്ഷിക്കാനുള്ള പോരാട്ടമായിട്ടാണ് കാണുന്നത്.