ഐപിഎല്ലിലെ ഗ്ലെൻ മാക്സ്വെല്ലിന്റെ സ്ഥിരതയില്ലാത്ത പ്രകടനം വീണ്ടും വിമർശനത്തിന് വിധേയമായതോടെ മുൻ ഇന്ത്യൻ ക്രിക്കറ്റ് താരം സഞ്ജയ് മഞ്ജരേക്കർ അദ്ദേഹത്തെ കളിയാക്കി രംഗത്ത്. ഇന്നലെ രാജസ്ഥാൻ റോയൽസിനെതിരെ മാക്സ്വെൽ 30 റൺസ് നേടിയെങ്കിലും സീസണിലെ ആദ്യ മത്സരത്തിൽ പഞ്ചാബ് കിംഗ്സ് പരാജയപ്പെട്ടു. ആദ്യം ബാറ്റ് ചെയ്ത രാജസ്ഥാൻ ഉയർത്തിയ 205 റൺ വിജയലക്ഷ്യം പിന്തുടർന്ന പഞ്ചാബ് 50 റൺസിന്റെ പരാജയമാണ് ഏറ്റുവാങ്ങിയത്.
സീസണിലെ ആദ്യ 2 മത്സരങ്ങളിലും നന്നായി കളിച്ച പഞ്ചാബിനെ കളിയുടെ എല്ലാ മേഖലയിലും രാജസ്ഥാൻ പിന്നിലാക്കി എന്നതാണ് ശ്രദ്ധിക്കേണ്ടത്. 206 റൺസ് വിജയലക്ഷ്യം പിന്തുടർന്ന മാക്സ്വെല്ലിന്, ടോപ് ഓർഡർ പരാജയത്തിന് ശേഷം ടീമിനെ വിജയത്തിലേക്ക് നയിക്കുക എന്ന കഠിനമായ ജോലി മുന്നിൽ ഉണ്ടായിരുന്നു. പവർപ്ലേയ്ക്ക് ശേഷം യുവതാരം നെഹാൽ വധേരയ്ക്കൊപ്പം ഒരു കൂട്ടുകെട്ട് ഉയർത്തി വിജയപ്രതീക്ഷ നൽകി എങ്കിലും അനാവശ്യമായി വിക്കറ്റ് വലിച്ചെറിഞ്ഞ് താരം വീണ്ടും പഞ്ചാബിനെ പ്രതിരോധത്തിലാക്കി.
ഏഴാം ഓവറിൽ ആണ് ഓസ്ട്രേലിയൻ താരം ബാറ്റ് ചെയ്യാൻ ഇറങ്ങിയത്. അപ്പോഴാണ് മഞ്ജരേക്കർ കമന്ററി ബോക്സിൽ ഒരു ജ്യോതിശാസ്ത്ര പരാമർശം നടത്തുകയും മാക്സ്വെല്ലിന്റെ ബാറ്റിംഗിനെ ഹാലിയുടെ വാൽനക്ഷത്രവുമായി താരതമ്യം ചെയ്യുകയും ചെയ്തത്.
“ഹാലിയുടെ വാൽനക്ഷത്രം സൂര്യനെ ചുറ്റുകയും 75 വർഷത്തിലൊരിക്കൽ ഭൂമിയിൽ ദൃശ്യമാകുകയും ചെയ്യുന്നു. അതുപോലെ, ഗ്ലെൻ മാക്സ്വെൽ 75 മത്സരങ്ങളിൽ ഒരു നല്ല മത്സരം കളിക്കുന്നു. ഇത് അവസാനമായി കണ്ടത് 1986 ലാണ്, ഇപ്പോൾ ഇത് 2061 ൽ കാണപ്പെടും. ബാറ്റിംഗിൽ മാക്സ്വെല്ലിന്റെ കാര്യവും ഇതുതന്നെയാണ്. ഗ്ലെൻ മാക്സ്വെൽ ഹാലിയുടെ ക്രിക്കറ്റിന്റെ വാൽനക്ഷത്രമാണ്,” മഞ്ജരേക്കർ ജിയോഹോട്ട്സ്റ്റാറിൽ പറഞ്ഞു.