ചെന്നൈയ്‌ക്കെതിരായ ഫൈനല്‍ തോല്‍വിയില്‍ മധ്യനിരയെ പഴിച്ച് കെകെആര്‍ പരിശീലകന്‍ ബ്രണ്ടന്‍ മക്കല്ലം. ഒരുപാട് പരിചയസമ്പത്തുള്ള കളിക്കാരാണ് മധ്യനിരയിലുണ്ടായിന്നതെങ്കിലും മികച്ച ടൂര്‍ണമെന്റ് അല്ല അവര്‍ക്ക് ലഭിച്ചതെന്ന് മക്കല്ലം പറഞ്ഞു.
‘വിജയ ലക്ഷ്യത്തിന് അരികെ വീണു എന്നത് നാണക്കേടാണ്. ഞങ്ങളുടെ ബോളിംഗ് ഗ്രൂപ്പ് വളരെ നന്നായി കളിച്ചു. ഞങ്ങള്‍ നന്നായി ഫീല്‍ഡ് ചെയ്തു. ടോപ് ഓര്‍ഡര്‍ ബാറ്റിംഗും വളരെ മികച്ചതായിരുന്നു. എന്നാല്‍ മധ്യനിരക്ക് അവരുടെ പ്രഭാവത്തിനൊത്ത് ഉയരാനായില്ല. ഒരുപാട് പരിചയസമ്പത്തുള്ള കളിക്കാരാണ്. എന്നാല്‍ മികച്ച ടൂര്‍ണമെന്റ് അല്ല അവര്‍ക്ക് ലഭിച്ചത്. അങ്ങനേയും സംഭവിക്കും’ മക്കല്ലം പറഞ്ഞു.
വെടിക്കെട്ട് ബാറ്റ്‌സ്മാന്‍ ആന്ദ്രെ റസലിനെ ഇറക്കാത്തതിനെ കുറിച്ചും മക്കല്ലം പ്രതികരിച്ചു. ‘മാച്ച് ഫിറ്റ്നസ് നേടിയെടുക്കുന്നതിനായി അവന്‍ കഠിനാധ്വാനം ചെയ്തിരുന്നു. അതിശയിപ്പിക്കും വിധം കഠിനാധ്വാനം ചെയ്തിട്ടും ഫലമുണ്ടായില്ല. പരിക്കിന്റെ പിടിയില്‍ തന്നെയാണ് റസല്‍ ഇപ്പോഴും. ഫൈനലില്‍ പരിക്കുമായി ഒരു താരത്തെ ഇറക്കി റിസ്‌ക് എടുക്കാനാവില്ല’ മക്കല്ലം പറഞ്ഞു.
ഏറെക്കുറെ ഏകപക്ഷീയമായ ഫൈനലില്‍ കൊല്‍ക്കത്ത നൈറ്റ് റൈഡേഴ്സിനെ 27 റണ്‍സിന് കീഴടക്കിയാണ് സൂപ്പര്‍ കിംഗ്സ് നാലാം ഐപിഎല്‍ ട്രോഫി ഷെല്‍ഫിലെത്തിച്ചത്. 2010, 2011, 2018 വര്‍ഷങ്ങളിലും സൂപ്പര്‍ കിംഗ്സ് ജേതാക്കളായിരുന്നു. ഇതോടെ ഐപിഎല്‍ കിരീടങ്ങളുടെ കാര്യത്തില്‍ മുംബൈ ഇന്ത്യന്‍സിനോട് (5) അടുക്കാനും സൂപ്പര്‍ കിംഗ്സിനായി. 2012 ഫൈനലില്‍ തങ്ങളെ തോല്‍പ്പിച്ച കൊല്‍ക്കത്തയോട് പ്രതികാരം ചെയ്യാനും സൂപ്പര്‍ കിംഗ്സിന് സാധിച്ചു.