ലോക കപ്പ് സെമിഫൈനല്‍ മത്സരത്തില്‍ ന്യൂസിലന്‍ഡിനെതിരെ ഇന്ത്യയ്ക്ക് 240 റണ്‍സ് വിജയലക്ഷ്യം. മഴ മൂലം രണ്ടാം ദിവസത്തേയ്ക്ക് നീണ്ട മത്സരത്തില്‍ എട്ട് വിക്കറ്റ് നഷ്ടത്തിലാണ് കിവീസ് 239 റണ്‍സ് എടുത്തത്.
അഞ്ചിന് 211 റണ്‍സ് എന്ന നിലിയില്‍ ബാറ്റിംഗ് തുടങ്ങിയ ന്യൂസിലന്‍ഡ് പരമാവധി റണ്‍സ് ഓടിയെടുക്കാനാണ് ശ്രമിച്ചത്. എന്നാല്‍ 48ാം ഓവറില്‍ ടൈലര്‍ റണ്ണൗട്ടായി. 90 പന്തില്‍ മൂന്ന് ബൗണ്ടറികളടക്കം 74 റണ്‍സാണ് ടൈലര്‍ സ്വന്തമാക്കിയത്. തൊട്ടടുത്ത പന്തില്‍ ഭുവനേശ്വറിനെ സിക്‌സ് അടിക്കാനുളള ശ്രമത്തില്‍ ടോം ലാഥമിനെ ജഡേജ പിടിച്ച് പുറത്താക്കി. 11 പന്തില്‍ 10 റണ്‍സാണ് ലാഥം നേടിയത്.
ഒരു റണ്‍സെടുത്ത ഹെന്റിയുടെ വിക്കറ്റും ഭുവനേശ്വറാണ് സ്വന്തമാക്കിയത്.
ഇന്ത്യയ്ക്കായി ഭുവനേശ്വര്‍ കുമാര്‍ 10 ഓവറില്‍ 43 റണ്‍സ് വങ്ങി മൂന്ന് വിക്കറ്റ് വീഴ്ത്തി. ഭുംറ ഹാര്‍ദ്ദിക്ക് പാണ്ഡ്യ രവീന്ദ്ര ജഡേജ ചഹല്‍ എന്നിവര്‍ ഓരോ വിക്കറ്റ് വീതവും വീഴ്ത്തി.
നേരത്തെ ന്യൂസിലന്‍ഡ് നിരയില്‍ നായകന്‍ കെയ്ന്‍ വില്യസണും അര്‍ധ സെഞ്ച്വറി നേടിയിരുന്നു. 95 പന്തില്‍ ആറ് ബൗണ്ടറിയടക്കമാണ് വില്യംസണ്‍ അര്‍ധ സെഞ്ച്വറി നേടിയത്.