ഇന്ത്യക്കെതിരായ ടെസ്റ്റ് പരമ്പരയ്ക്കുള്ള ഓസീസ് ടീം യാത്ര തിരിച്ചു. എന്നാല് ഓസ്ട്രേലിയന് ഓപ്പണര് ഉസ്മാന് ഖവാജയ്ക്ക് സഹതാരങ്ങള്ക്കൊപ്പം യാത്ര തിരിക്കാനായില്ല. താരത്തിന്റെ വിസ വൈകിയതിനാലാണ് യാത്ര മുടങ്ങിയത്. വ്യാഴാഴ്ച ടീമിനൊപ്പം ചേരാനാകുമെന്നാണ് പ്രതീക്ഷയെന്നും വിസയ്ക്കായി കാത്തിരിക്കുകയാണെന്നും ഖവാജ സോഷ്യല് മീഡിയയില് കുറിച്ചു.
ഇന്ത്യക്കെതിരായ ടെസ്റ്റ് പരമ്പരയ്ക്കുള്ള ഓസ്ട്രേലിയന് ടീമിനെ പാറ്റ് കമ്മിന്സാണ് നയിക്കുന്നത്. ആഷ്ടണ് ആഗര്, സ്കോട്ട് ബോളണ്ട്, അലക്സ് ക്യാരി, കാമറൂണ് ഗ്രീന്, ജോഷ് ഹെയ്സല്വുഡ്, പീറ്റര് ഹാന്ഡ്സ്കോമ്പ്, ട്രാവിസ് ഹെഡ്, ഉസ്മാന് ഖവാജ, മാര്നസ് ലബൂഷെയ്ന്, നഥാന് ലിയോണ്, ലാന്സ് മോറിസ്, ടോഡ് മര്ഫി, മാത്യു റെന്ഷോ, സ്റ്റീവ് സ്മിത്ത്, മിച്ചല് സ്റ്റാര്ക്ക്, മിച്ചല് സ്വെപ്സണ്, ഡേവിഡ് വാര്ണര് എന്നിവരാണ് ടീമിലുള്ളത്.
നാല് മത്സരങ്ങളുള്ള ടെസ്റ്റ് പരമ്പരയ്ക്ക് ഫെബ്രുവരി ഒന്പതിന് നാഗ്പൂരില് തുടക്കമാകും. ഫെബ്രുവരി 17 ന് രണ്ടാം ടെസ്റ്റ് ഡല്ഹിയിലും മൂന്നാം ടെസ്റ്റ് മാര്ച്ച് ഒന്നിന് ധരംശാലയിലും നടക്കും. നാലാം ടെസ്റ്റ് അഹമ്മദാബാദില് മാര്ച്ച് ഒന്പതിന് ആരംഭിക്കും.
അതേസമയം, ഒന്നാം ടെസ്റ്റില് നിന്ന് ഇന്ത്യന് ബാറ്റര് ശ്രേയസ് അയ്യര് പുറത്തായി. പുറത്തിനേറ്റ പരിക്ക് പൂര്ണ്ണമായി സുഖമാകാത്തതിനാലാണ് താരത്തിന്റെ പിന്മാറ്റം. എന്നിരുന്നാലും രണ്ടാം ടെസ്റ്റില് ശ്രേയസ് അയ്യര് ഫിറ്റ്നസ് വീണ്ടെടുത്ത് ടീമിനൊപ്പം ചേരുമെന്നാണ് അറിയുന്നത്.
ടെസ്റ്റ് പരമ്പരയ്ക്കുള്ള ഇന്ത്യന് ടീം: രോഹിത് ശര്മ (ക്യാപ്റ്റന്), കെഎല് രാഹുല് (വൈസ് ക്യാപ്റ്റന്), ശുഭ്മാന് ഗില്, വിരാട് കോലി, ചേതേശ്വര് പുജാര, ശ്രേയസ് അയ്യര്, സൂര്യകുമാര് യാദവ്, കെഎസ് ഭരത് (വിക്കറ്റ് കീപ്പര്), ഇഷാന് കിഷന് (വിക്കറ്റ് കീപ്പര്), ആര് അശ്വിന്, അക്ഷര് പട്ടേല്, കുല്ദീപ് യാദവ്, രവീന്ദ്ര ജഡേജ, മുഹമ്മദ്. ഷമി, മുഹമ്മദ് സിറാജ്, ഉമേഷ് യാദവ്, ജയ്ദേവ് ഉനാട്കട്ട്.