ഐ.സി.സി ടെസ്റ്റ് ചാമ്പ്യന്‍ഷിപ്പ് പോയിന്റ് പട്ടികയില്‍ ഇംഗ്ലണ്ട് മൂന്നാം സ്ഥാനത്തെത്ത്്. വിന്‍ഡീസിനെതിരായ പരമ്പര സ്വന്തമാക്കിയതോടെയാണ് ഇംഗ്ലണ്ട് നിലമെച്ചപ്പെടുത്തിയത്. വിന്‍ഡീസിനെതിരായ രണ്ട് വിജയത്തോടെ 80 പോയിന്റ് നേടിയ ഇംഗ്ലണ്ട് ന്യൂസിലാന്‍ഡിനെ പിന്തള്ളിയാണ് മൂന്നാം സ്ഥാനത്ത് എത്തിയത്. 226 പോയിന്റാണ് ഇംഗ്ലണ്ടിന് ഇപ്പോഴുള്ളത്.
നിലവില്‍ ഇന്ത്യയാണ് ടെസ്റ്റ് ചാമ്പ്യന്‍ഷിപ്പ് പോയിന്റ് പട്ടികയില്‍ ഒന്നാമതാണുള്ളത്. 9 ടെസ്റ്റുകളില്‍ നിന്ന് 360 പോയിന്റാണ് ഇന്ത്യയ്ക്കുള്ളത്. രണ്ടാമതുള്ള ഓസ്ട്രേലിയയ്ക്ക് 10 മത്സരങ്ങളില്‍ നിന്ന് 296 പോയിന്റുണ്ട്. ന്യൂസിലാന്‍ഡ്, പാകിസ്ഥാന്‍ എന്നിവരാണ് യഥാക്രം നാലും അഞ്ചും സ്ഥാനങ്ങളില്‍ ഉള്ളത്.
നിലവിലെ സാഹചര്യത്തില്‍ ഓസ്ട്രേലിയക്കെതിരെ ഡിസംബറില്‍ നടക്കുന്ന ഇന്ത്യയുടെ ടെസ്റ്റ് പരമ്പര ക്രിക്കറ്റ് ആരാധകര്‍ ആകാംക്ഷയോടെയാണ് ഉറ്റുനോക്കുന്നത്. പോയിന്റ് പട്ടികയില്‍ ഒന്നും രണ്ടും സ്ഥാനത്തുള്ളവര്‍ ഏറ്റുമുട്ടുമ്പോള്‍ മത്സരം ഏറെ മികച്ചതാകും. കോവിഡ് കാലത്ത് ഇന്ത്യ കളിക്കുന്ന ആദ്യ ടെസ്റ്റ് പരമ്പരയും ഇതാണ്. ഒരു ഡേ ആന്‍ഡ് നൈറ്റ് ടെസ്റ്റ് ഉള്‍പ്പെടെ നാല് ടെസ്റ്റും മൂന്നു ഏകദിനങ്ങളുമാണ് ഓസ്ട്രേലിയന്‍ പര്യടനത്തിലുള്ളത്.
പാകിസ്ഥാനുമായാണ് ഇനി ഇംഗ്ലണ്ടിന്റെ ടെസ്റ്റ് പരമ്പര. നേരത്തെതന്നെ ഇംഗ്ലണ്ടിലെത്തിയ പാക് താരങ്ങള്‍ ഇപ്പോള്‍ ക്വാറന്റെയ്നിലാണ്. ആഗസ്റ്റ് 5 നാണ് ആദ്യ ടെസ്റ്റ്് ആരംഭിക്കുക. അഞ്ച് ടെസ്റ്റും മൂന്ന് ടി20യുമാണ് പാകിസ്ഥാന്റെ ഇംഗ്ലണ്ട് പര്യടനത്തിലുള്ളത്.