വ്യത്യസ്തമായ സാഹചര്യങ്ങളോട് പൊരുത്തപ്പെടുന്നതിനായാണ് എല്ലാ താരങ്ങളും ഐ.പി.എല്‍ കളിക്കുന്നതെന്ന് ഡല്‍ഹിയിയുടെ വിന്‍ഡീസ് താരം ഷിമ്രോണ്‍ ഹെറ്റ്മെയര്. ഐപിഎല്ലിലൂടെ തന്റെ കഴിവിനെ താന്‍ കൂടുതല്‍ മനസിലാക്കിയെന്നും ഹെറ്റ്മെയര് പറഞ്ഞു.
“വ്യത്യസ്ത സാഹചര്യങ്ങളില്‍ കളിക്കുന്നത് വെല്ലുവിളിയായിട്ട് തോന്നുന്നില്ല. കാരണം ഐ.പി.എല്ലില്‍ കളിക്കുന്നവരില്‍ നിരവധി പേര്‍ അന്താരാഷ്ട്ര ക്രിക്കറ്റിലും കളിക്കുന്നവരാണ്. അതിനാല്‍ത്തന്നെ സാഹചര്യങ്ങളോട് പൊരുത്തപ്പെടാന്‍ അവര്‍ക്കറിയാം. സാഹചര്യങ്ങളെയും പിച്ചിനെയും മനസിലാക്കി കളിക്കുകയെന്നതാണ് പ്രധാനം.”
“ഐ.പി.എല്ലിലൂടെ ഞാന്‍ എന്റെ കഴിവിനെ കൂടുതല്‍ മനസിലാക്കിയെന്നാണ് കരുതുന്നത്. കൂടുതല്‍ സ്ഥിരതയോടെയും പോസിറ്റീവായും കളിക്കാനാണ് ശ്രമിക്കുന്നത്. വെസ്റ്റ് ഇന്‍ഡീസ് ടീമില്‍ ടോപ് ഓഡറിലാണ് കളിക്കുന്നത്. അതിനാല്‍ കൂടുതല്‍ ഉത്തരവാദിത്വം കാട്ടേണ്ടതായുണ്ട്.”
“വമ്പന്‍ ഷോട്ടുകള്‍ കുറച്ചു മാത്രമാണ് ഇപ്പോള്‍ കളിക്കാറ്. ഇത് മാനസികമായി പോസിറ്റീവ് ചിന്ത നല്‍കുന്നു. ഏത് സമയത്തും ആക്രമണത്തിലേക്ക് ഗിയര്‍ മാറ്റാനും ഉത്തരവാദിത്വത്തോടെ കളിക്കാനും ഇത് ധൈര്യം നല്‍കുന്നു” ഹെറ്റ്മെയര് പറഞ്ഞു.
