ഒടുവില്‍ വിന്‍ഡീസ് സൂപ്പര്‍ താരം ക്രിസ് ഗെയില്‍ ശരിയ്ക്കും യൂണിവേഴ്‌സല്‍ ബോസായി. കാനഡ ടി20 ലീഗില്‍ സംഹാര താണ്ഡവമാടിയ ഗെയില്‍ വെടിക്കെട്ട് സെഞ്ച്വറിയാണ് സ്വന്തമാക്കിയത്. ടൂര്‍ണമെന്റില്‍ വാന്‍ കൂവര്‍ നൈറ്റ്‌സിന്റെ നായകനായ ഗെയില്‍ കഴിഞ്ഞ ദിവസം മോണ്‍ ട്രിയോള്‍ ടൈഗേഴ്‌സിനെതിരെയാണ് ക്രിക്കറ്റ് ലോകത്തെ അമ്പരപ്പിച്ച് സെഞ്ച്വറി തിരച്ചത്.
മത്സരത്തില്‍ 54 പന്തില്‍ ഏഴ് ഫോറും 12 സിക്‌സും സഹിതം പുറത്താകാതെ 122 റണ്‍സ് ആണ് ഗെയില്‍ നേടിയത്. ഇതോടെ നിശ്ചിത 20 ഓവറില്‍ വാന്‍ കൂവര്‍ മൂന്ന് വിക്കറ്റിന് 276 റണ്‍സ് അടിച്ചെടുത്തു. മൊത്തം 24 ബൗണ്ടറികളും, 21 സിക്‌സറുകളുമാണ് ഈ മത്സരത്തില്‍ വാന്‍ കൂവര്‍ ബാറ്റ്‌സ്മാന്മാര്‍ അടിച്ച് കൂട്ടിയത്.
എന്നാല്‍ നിര്‍ഭാഗ്യവശാല്‍ ഈ മത്സരത്തിന് ഫലമുണ്ടായില്ല. പ്രതികൂല കാലാവസ്ഥയെത്തുടര്‍ന്ന് മത്സരം ഉപേക്ഷിക്കാന്‍ അമ്പയര്‍മാര്‍ നിര്‍ബന്ധിതരാവുകയായിരുന്നു. ആദ്യ ബാറ്റിംഗിന് പിന്നാലെയെത്തിയ മഴയും മിന്നലുമായിരുന്നു കളി ഉപേക്ഷിക്കുന്നതിലേക്ക് നയിച്ചത്.
മത്സരത്തില്‍ ടോസ് നഷ്ടപ്പെട്ട് ബാറ്റിംഗിനിറങ്ങേണ്ടി വന്ന വാന്‍ കൂവര്‍ നൈറ്റ്‌സിന് വേണ്ടി ഓപ്പണര്‍മാരായ ടൊബിയാസ് വീസെയും, ക്രിസ് ഗെയിലും ചേര്‍ന്ന് മിന്നും തുടക്കമാണ് നല്‍കിയത്. 19 പന്തില്‍ 51 റണ്‍സെടുത്ത വീസെ ആയിരുന്നു ആദ്യം വീണത്. ക്രിസ് ഗെയില്‍ പിന്നീട് വെടിക്കെട്ട് തുടങ്ങി. സിക്‌സറുകളുടെ മാലപ്പടക്കം തീര്‍ത്ത ഗെയില്‍ ടീമിനെ ഹിമാലയന്‍ ടോട്ടലിലേക്ക് കൈപിടിച്ചുയര്‍ത്തുകയായിരുന്നു.
അതേ സമയം മറുവശത്ത് പന്തെറിഞ്ഞവരെല്ലാം നന്നായി തല്ലുവാങ്ങി. സുനില്‍നരൈന്‍ നാല് ഓവറില്‍ വഴങ്ങിയത് 50 റണ്‍സാണ്.