കൗണ്ടി ക്രിക്കറ്റില്‍ തകര്‍പ്പന്‍ ഫോം തുടര്‍ന്ന് ഇന്ത്യന്‍ സീനിയര്‍ താരം ചേതേശ്വര്‍ പൂജാര. സസ്സക്‌സിന് വേണ്ടി കളിക്കുന്ന താരം തുടര്‍ച്ചയായി നാലാം മത്സരത്തിലും സെഞ്ച്വറി നേടി. കഴിഞ്ഞ ദിവസം മിഡില്‍സെക്സിനെതിരെ പുറത്താവാതെ 197 പന്തില്‍ 170 റണ്‍സാണ് താരം അടിച്ചെടുത്തത്.
ഈ മത്സരത്തില്‍ പാകിസ്ഥാന്‍ പേസര്‍ ഷഹീന്‍ അഫ്രീദിയും പൂജാരയും നേര്‍ക്കുനേര്‍ വന്നു എന്നതും ശ്രദ്ധേയമായി. നേര്‍ക്കുനേരുള്ള പോരില്‍ ഷഹീനിന്റെ ഒരു പന്ത് പൂജാര അപ്പര്‍ കട്ടിലൂടെ സിക്‌സ് പറത്തുകയും ചെയ്തു. ഇതിന്റെ വീഡിയോ സോഷ്യല്‍ മീഡിയയില്‍ വൈറലായിട്ടുണ്ട്.
ചാമ്പ്യന്‍ഷിപ്പില്‍ നാല് മത്സരങ്ങളില്‍ നിന്ന് രണ്ട് വീതം സെഞ്ച്വറയും ഇരട്ട സെഞ്ച്വറിയും താരത്തിന്റെ ബാറ്റില്‍ നിന്ന് പിറന്നു കഴിഞ്ഞു. 201*, 109, 203, 170* എന്നിങ്ങനെയാണ് പൂജാരയുടെ ഇതുവരെയുള്ള പ്രകടനം.
നാല് മത്സരങ്ങളില്‍ നിന്ന് 717 റണ്‍സാണ് പൂജാര ഇതുവരെ അടിച്ചെടുത്തിരിക്കുന്നത്. 143.40 ശരാശരിയിലാണ് ഇത്രയും റണ്‍സ് നേടിയത്.