ഐപിഎല്ലില്‍ നിന്നും കൂടി വിരമിച്ചാല്‍ ബോളിവുഡിലേക്ക് പ്രവേശിക്കുമോ എന്ന കാര്യത്തില്‍ പ്രതികരിച്ച് എംഎസ് ധോണി. ബോളിവുഡിലേക്കെത്താന്‍ തനിക്കൊരു പദ്ധതിയുമില്ലെന്നും അത് അഭിനയിക്കാന്‍ കഴിവുള്ളവര്‍ക്ക് പറഞ്ഞിരിക്കുന്ന പണിയാണെന്നും ധോണി പറഞ്ഞു.
‘നിങ്ങള്‍ക്കറിയാമല്ലോ ബോളിവുഡ് എന്റെ അഭിരുചിയില്‍ ഉള്‍പ്പെടുന്ന കാര്യമല്ല. പരസ്യങ്ങളിലേക്ക് പരിഗണിച്ചാല്‍ അത് ചെയ്യാന്‍ സന്തോഷമേയുള്ളു. എന്നാല്‍ സിനിമയിലേക്കില്ല. കാരണം അത് കൈകാര്യം ചെയ്യാന്‍ വളരെ പ്രയാസമുള്ള മേഖലയും വളരെ ബുദ്ധിമുട്ടുള്ള പ്രൊഫഷനുമാണ്.’
‘സിനിമാ താരങ്ങള്‍ക്ക് അതിനുള്ള കഴിവുള്ളതിനാലാണ് അവര്‍ നന്നായി ചെയ്യുന്നത്. ഞാന്‍ ക്രിക്കറ്റില്‍ തന്നെ ഉറച്ചുനില്‍ക്കാനാണ് ആഗ്രഹിക്കുന്നത്. പരസ്യങ്ങളില്‍ അഭിനയിക്കുക എന്നതില്‍ കൂടുതല്‍ ആഗ്രഹങ്ങളൊന്നും ബോളിവുഡിലില്ല’ ധോണി പറഞ്ഞു.
പരസ്യ ചിത്രങ്ങളില്‍ ഏറെ സജീവമാണ് ധോണി. പെപ്സി, ബൂസ്റ്റ്, ടിവിഎസ് തുടങ്ങിയ പല പ്രമുഖ ബ്രാന്റിന്റെയും പരസ്യ ചിത്രത്തില്‍ ധോണി അഭിനയിച്ചിട്ടുണ്ട്. ധോണിയും മകള്‍ സിവയും ചേര്‍ന്ന് ഓറിയോ ബിസ്‌ക്കറ്റിന്റെ പരസ്യത്തിലും അഭിനയിച്ചിരുന്നു. ഈ പരസ്യങ്ങളിലെല്ലാം മികച്ച അഭിനയമാണ് ധോണി കാഴ്ചവെയ്ക്കുന്നത്.