ഐപിഎല്ലില്‍ ഗുജറാത്തിനെ തോല്‍പ്പിക്കുക ഒരു ടീമിനും എളുപ്പമുള്ള കാര്യമല്ലെന്ന് ഇന്ത്യന്‍ മുന്‍ താരം ആകാശ് ചോപ്ര. ഗുജറാത്തിന് മറ്റ് ടീമുകള്‍ക്കൊന്നും ഇല്ലാത്ത തരത്തിലുള്ള മാച്ച് വിന്നര്‍മാരാണ് ഉള്ളതെന്നും അവസരത്തിനൊത്ത് ഓരോ താരങ്ങളും ഉത്തരവാദിത്വത്തിലേക്ക് വരുന്നുണ്ടെന്നും ചോപ്ര പറഞ്ഞു. ഐപിഎല്ലില്‍ രാജസ്ഥാന്‍ റോയല്‍സ് ഫൈനല്‍ ഉറപ്പിച്ച വേളയിലാണ് ചോപ്രയുടെ പ്രതികരണം.
‘ഗുജറാത്ത് ടീമില്‍ വമ്പന്‍ താരങ്ങളൊന്നും ഇല്ല. സൂപ്പര്‍ താരങ്ങളുടെ ഒരു പാരമ്പര്യം അവര്‍ക്കില്ല. കോഹ്‌ലിയോ ഡിവില്യേഴ്സോ റണ്‍സടിക്കും എന്നൊരു കാര്യം ഗുജറാത്ത് ടീമില്‍ ഇല്ല. അവിടെ എല്ലാവരും കളിക്കുന്നുണ്ട്.’
‘ഗുജറാത്തും മറ്റ് ടീമുകളും തമ്മില്‍ ഒരുപാട് വ്യത്യാസമുണ്ട്. ഗുജറാത്ത് നിരയിലെ മാച്ച് വിന്നര്‍മാരാണ് അവരുടെ പ്രത്യേകത. അത് മറ്റൊരു ടീമിനും ഇല്ലാത്ത വിധമാണ്. അങ്ങനെ പറയേണ്ടി വരുന്നത് വളരെ വിചിത്രമായ കാര്യമാണ്.’
‘ഗുജറാത്ത് ഈ സീസണില്‍ പലപ്പോഴും പ്രതിസന്ധി ഘട്ടങ്ങളില്‍ വീണിട്ടുണ്ട്. എന്നാല്‍ ആ സമയത്തൊക്കെ അവരെ രക്ഷിച്ചത് പല കളിക്കാരാണ്. അതുകൊണ്ടാണ് അവര്‍ക്ക് ഏത് പൊസിഷനില്‍ നിന്നും ടീമിനെ വിജയിപ്പിക്കാന്‍ പറ്റിയ താരങ്ങളുണ്ടെന്ന് പറയുന്നത്. അത് മറ്റ് ടീമുകളില്‍ കണ്ടിട്ടില്ല.’
‘ഏത് ദുഷ്‌കരമായ സാഹചര്യത്തിലും ടീം വീഴില്ല എന്ന് ഗുജറാത്ത് തെളിയിച്ച് കഴിഞ്ഞു. മൂന്നോ നാലോ കളിക്കാരില്‍ ഒതുങ്ങുന്നതല്ല അവരുടെ മാച്ച് വിന്നിംഗ്. എല്ലാവരും ടീം സ്‌കോറിലേക്ക് സംഭാവന ചെയ്യും. അങ്ങനൊരു ടീമിനെ ആര് വിചാരിച്ചാലും തടഞ്ഞ് നിര്‍ത്താനാവില്ല’ ചോപ്ര പറഞ്ഞു.