ഐപിഎല് അവസാന ഘട്ടത്തില് ടൂര്ണമെന്റില് നിന്നും പിന്മാറിയ ചില താരങ്ങള്ക്ക് പകരക്കാരെ ടീം മാനേജ്മെന്റുകള് അടുത്തിടെ കണ്ടെത്തിയിരുന്നു. പ്ലേഓഫ് മത്സരങ്ങള്ക്ക് മുന്നോടിയായാണ് ചില സൂപ്പര്താരങ്ങള് വീണ്ടും ഐപിഎലിന് എത്തുന്നത്. അതേസമയം താരങ്ങളുടെ പ്രതിഫലത്തെ കുറിച്ചുളള വാര്ത്തകളില് പ്രതികരണവുമായി എത്തിയിരിക്കുകയാണ് മുന് ഇന്ത്യന് താരം ആകാശ് ചോപ്ര. സൈന് ചെയ്യുമ്പോള് പറയുന്ന പൈസ മുഴുവനായി അവര്ക്ക് ലഭിക്കില്ലെന്നും എത്ര മത്സരങ്ങള് കളിക്കുന്നോ അതിനനുസരിച്ചായിരിക്കും ശമ്പളം ലഭിക്കുകയെന്നും ആകാശ് ചോപ്ര പറഞ്ഞു.
അടുത്തിടെ മുംബൈ ഇന്ത്യന്സ് ജോണി ബെയര്സ്റ്റോ (5.25 കോടി), റിച്ചാര്ഡ് ഗ്ലീസന് (1 കോടി), ചരിത് അസലങ്ക (75 ലക്ഷം) തുടങ്ങിയ താരങ്ങളെ വില് ജാക്സ്, റിയാന് റിക്കല്ട്ടണ്, കോര്ബിയന് ബോഷ് എന്നിവര്ക്ക് പകരക്കാരായി ടീമിലെടുത്തിരുന്നു. “പ്ലേഓഫിനായി മുംബൈ ജോണി ബെയര്സ്റ്റോ, റിച്ചാര്ഡ് ഗ്ലീസണ്, ചരിത് അസലങ്ക എന്നിവരെ സൈന് ചെയ്തതിനാലോ, മുസ്തഫിസുര് റഹ്മാന് വന്നതിനാലോ, ലുങ്കി എന്ഗിഡിക്ക് പകരം ആര്സിബി ബ്ലെസ്സിംഗ് മുസറബാനിയെ സൈന് ചെയ്തതിനാലോ, അവര്ക്ക് എത്ര പണം ലഭിക്കുമെന്ന് നിങ്ങള് ചിന്തിച്ചേക്കാം?
‘മൂന്ന് മത്സരങ്ങള്ക്ക് 5.25 കോടിക്ക് ബെയര്സ്റ്റോ കരാര് ചെയ്യപ്പെട്ടതിനാല് അദ്ദേഹം ഏറ്റവും വിലയേറിയ കളിക്കാരനായി മാറിയെന്ന് പലരും സോഷ്യല് മീഡിയയില് വ്യാജ വാര്ത്തകള് പ്രചരിപ്പിക്കുന്നു. അപ്പോള്, ഋഷഭ് പന്ത് ഏറ്റവും വിലയേറിയ കളിക്കാരനാണെന്ന് ആരാണ് പറഞ്ഞത്? ഇല്ല സര്, സത്യം പറഞ്ഞാല് അവരെ ആ ബ്രാക്കറ്റില് ഉള്പ്പെടുത്തിയിട്ടുണ്ട്, പക്ഷേ അവര്ക്ക് ആനുപാതികമായി മാത്രമേ പണം ലഭിക്കൂ,’ ചോപ്ര പറഞ്ഞു.