ഇന്ന് റിലീസ് ചെയ്ത വിക്കി കൗശല്-തൃപ്തി ദിമ്രി ചിത്രം ‘ബാഡ് ന്യൂസി’ലെ ലിപ്ലോക് സീനുകളില് മാറ്റം വരുത്താന് ആവശ്യപ്പെട്ട് സെന്സര് ബോര്ഡ്. വിക്കി കൗശലും തൃപ്തി ദിമ്രിയും ഉള്പ്പെടുന്ന 27 സെക്കന്ഡ് ദൈര്ഘ്യമുള്ള മൂന്ന് ലിപ്ലോക്ക് സീനുകളില് പരിഷ്ക്കരണം വരുത്താനുള്ള നിര്ദേശമാണ് സെന്സര് ബോര്ഡ് നല്കിയത്.
ലിപ്ലോക്ക് കട്ട് ചെയ്യാന് ആവശ്യപ്പെട്ടിട്ടില്ല, എന്നാല് 10 സെക്കന്ഡ്, 8 സെക്കന്ഡ്, 9 സെക്കന്ഡ് ദൈര്ഘ്യമുള്ള മൂന്ന് സീനുകളില് ലിപ് ലോക്ക് രംഗങ്ങള് പരിഷ്കരിക്കാന് ആവശ്യപ്പെട്ടതായുമാണ് ബോളിവുഡ് മാധ്യമങ്ങള് റിപ്പോര്ട്ട് ചെയ്യുന്നത്.
സ്ക്രീനിലെ മദ്യവിരുദ്ധ വാചകങ്ങളുടെ വലുപ്പം വര്ദ്ധിപ്പിക്കാന് അടക്കം ചില ചെറിയ മാറ്റങ്ങളും സെന്സര് ബോര്ഡ് ആവശ്യപ്പെട്ടിട്ടുണ്ട്. കോമഡി എന്റര്ടെയ്നര് ആയാണ് സിനിമ എത്തുന്നത്. ആനന്ദ് തിവാരിയാണ് ചിത്രം സംവിധാനം ചെയ്യുന്നത്.
2019ല് പുറത്തിറങ്ങിയ ഗുഡ് ന്യൂസ് എന്ന ചിത്രത്തിന്റെ നിര്മാതാക്കള് തന്നെയാണ് ‘ബാഡ് ന്യൂസും’ നിര്മിച്ചിരിക്കുന്നത്. ഹിരൂ യാഷ് ജോഹര്, കരണ് ജോഹര്, അപൂര്വ മേത്ത, അമൃതപാല് സിങ് ബിന്ദ്ര, ആനന്ദ് തിവാരി എന്നിവര് ചേര്ന്നാണ് ചിത്രം നിര്മ്മിക്കുന്നത്.
ഗര്ഭിണിയായ തൃപ്തി ദിമ്രി തന്റെ ഗര്ഭസ്ഥ ശിശുവിന്റെ പിതാവായി രണ്ടുപേരെ സംശയിക്കുന്നു. അതിനെ തുടര്ന്നുണ്ടാകുന്ന ഡിഎന്എ ടെസ്റ്റും തുടര്ന്നുള്ള രസകരമായ സംഭവങ്ങളുമാണ് ചിത്രത്തിന്റെ ഇതിവൃത്തം. വിക്കി കൗശലും, ആമി വിര്ക്കുമാണ് കാമുകന്മാരാകുന്നത്.