ഗൂഗിൾ നിയമം ലംഘിച്ചുവെന്ന് യുഎസ് കോടതിയുടെ കണ്ടെത്തൽ. സെര്ച്ച് എഞ്ചിന് കുത്തക നിലനിര്ത്താന് കോടികളൊഴുക്കിയെന്നാണ് കോടതി കണ്ടെത്തിയിരിക്കുന്നത്. ലോകത്തിലെ പ്രധാന സെർച്ച് എഞ്ചിനായി മാറാനാണ് നിയമവിരുദ്ധമായും അനധികൃതമായി കോടിക്കണക്കിന് ഡോളർ ചെലവഴിച്ച് ഗൂഗിൾ ആൻ്റിട്രസ്റ്റ് നിയമം ലംഘിച്ചതെന്ന് യുഎസ് ജില്ലാ ജഡ്ജി ചൂണ്ടിക്കാട്ടി.
ഗൂഗിളിനെയും മാതൃ കമ്പനിയായ ആല്ഫബറ്റിനെയും കടുത്ത പ്രതിരോധത്തിലാക്കുന്നതാണ് ഈ കണ്ടെത്തല്. സ്മാർട്ട്ഫോണുകളിലും ബ്രൗസറുകളിലും ഡിഫോള്ട്ട് സെര്ച്ച് എഞ്ചിനായി ഗൂഗിള് ലഭ്യമാക്കാന് വിവിധ സ്മാര്ട്ട്ഫോണ് കമ്പനികള്ക്ക് ഗൂഗിള് കോടികള് അനധികൃതമായി നല്കിയെന്ന പ്രോസിക്യൂഷന് വാദം ശരിവെക്കുന്ന കണ്ടെത്തലാണിത്. ഗൂഗിളിനെയും മാതൃ കമ്പനിയായ ആല്ഫബറ്റിനെയും കടുത്ത പ്രതിരോധത്തിലാക്കുന്നതാണ് ഈ കണ്ടെത്തല്.
സാക്ഷി മൊഴികളും തെളിവുകളും ശ്രദ്ധാപൂർവ്വം പരിഗണിച്ച ശേഷമാണ് വിധി പറയുന്നതെന്നും ജഡ്ജി പറഞ്ഞു. പൊതുവായ തിരയൽ സേവനങ്ങളിൽ മാർക്കറ്റിൻ്റെ 89.2% വിഹിതവും ഗൂഗിളിനാണ്. മൊബൈൽ ഉപകരണങ്ങളിൽ 94.9% ആയി ഇത് വർദ്ധിച്ചിട്ടുണ്ടെന്നും വിധിയിൽ ചൂണ്ടിക്കാണിച്ചിട്ടുണ്ട്. സെർച്ച് എഞ്ചിൻ ഉപയോഗിക്കാൻ ആഗ്രഹിക്കുന്നതിനാൽ ഉപഭോക്താക്കൾക്കിടയിൽ ഇത് ജനപ്രിയമാണെന്ന് വാദിച്ച ഗൂഗിളിന് ഈ വിധി വൻ തിരിച്ചടിയാണെന്ന് വിലയിരുത്തപ്പെടുന്നു. ഗൂഗിളിൻ്റെ സെർച്ച് എഞ്ചിൻ ലോകമെമ്പാടും പ്രതിദിനം 8.5 ബില്യൺ അന്വേഷണങ്ങളാണ് പ്രൊസസ്സ് ചെയ്യുന്നത്. ഇത് 12 വർഷം മുമ്പുള്ളതിനേക്കാൾ ഇരട്ടിയാണെന്നും ചൂണ്ടിക്കാണിക്കപ്പെടുന്നു.
കേസില് രണ്ടാംഘട്ട വാദം നടക്കും. ഇതിലായിരിക്കും ഗൂഗിളിനെതിരെ കോടതി നിയമനടപടിയെടുക്കുക. അതിനിടെ കോടതി വിധിയെ യുഎസ് അറ്റോര്ണി ജനറല് മെറിക് ഗാര്ലാന്ഡ് പ്രശംസിച്ചു. ഒരു കമ്പനിയും നിയമത്തിന് മുകളിലല്ലെന്നും അറ്റോര്ണി ജനറല് പറഞ്ഞു. അതേസമയം കേസില് അപ്പീല് നല്കാനാണ് ഗൂഗിൾ തീരുമാനിച്ചിരിക്കുന്നത്.