യുക്രൈയിനെതിരെ ആക്രമണം കടുപ്പിച്ച് റഷ്യ. ശക്തമായ കരയുദ്ധം നടക്കുന്ന ഹാര്കിവില് റഷ്യയുടെ മുന്നേറ്റം തുടരുകയാണ്. ഇതോടെ കരയുദ്ധം നടക്കുന്ന രണ്ട് അതിര്ത്തിമേഖലകളില് തങ്ങളുടെ സൈന്യം അകപ്പെട്ടിരിക്കുകയാണെന്ന് യുക്രൈന് പ്രസിഡന്റ് വൊളോദിമിര് സെലെന്സ്കി വ്യക്തമാക്കി. ഹാര്കിവില് റഷ്യന് സൈന്യവുമായി പോരാടുന്ന സൈനികര്ക്ക് പിന്വാങ്ങാന്പോലുമാകാത്ത സ്ഥിതിയാണെന്നും അദ്ദേഹം പറഞ്ഞു.
വരുംദിവസങ്ങളിലെ വിദേശയാത്രകളെല്ലാം പ്രസിഡന്റ് വോളോദിമിര് സെലെന്സ്കി റദ്ദാക്കി. എന്നാല് അദ്ദേഹം കാരണം വ്യക്തമാക്കിയില്ല.
അതിനിടെ യുക്രെയ്നു 200 കോടി ഡോളറിന്റെ (16,696 രൂപ) സഹായംകൂടി നല്കുമെന്ന് അമേരിക്കന് വിദേശകാര്യ സെക്രട്ടറി ആന്റണി ബ്ലിങ്കന് പറഞ്ഞു. രണ്ടുദിവസമായി യുക്രെയ്നിലാണ് ബ്ലിങ്കന്. വടക്കുകിഴക്കുള്ള ഹര്കീവ് മേഖലയില് കഴിഞ്ഞയാഴ്ചമുതല് റഷ്യന് സൈന്യം മുന്നേറുകയാണ്. എണ്ണായിരത്തോളം നാട്ടുകാര് ഇവിടം വിട്ടുപോയി.
യു.എസും യൂറോപ്യന് യൂണിയനും യുക്രൈന് കൂടുതല് ആയുധസഹായം നല്കിയ പശ്ചാത്തലത്തില് റഷ്യ ആക്രമണം കടുപ്പിച്ചിരുന്നു. കരയുദ്ധത്തിലൂടെ ബോറിസിവ്ക്, ഒഗിര്ട്സവ, പ്ലെറ്റനിവ്ക, പില്ന, സ്ട്രിലെച്ച, കെറാമിക് എന്നീ ആറ് യുക്രൈന് ഗ്രാമങ്ങള് കഴിഞ്ഞദിവസം റഷ്യ പിടിച്ചെടുത്തിരുന്നു.