ഇറാന്റെ പരമോന്നത നേതാവ് ആയത്തൊള്ള അലി ഖമനെയി കൊല്ലപ്പെട്ടതിന് പിന്നാലെ തിരിച്ചടി കൂടുതൽ ശക്തമാക്കി ഇറാൻ. ഇപ്പോള് അമേരിക്കയുടെ വിവിധ രാജ്യങ്ങളിലെ സൈനിക താവളങ്ങളടക്കമുള്ള 27 കേന്ദ്രങ്ങളിലേക്കാണ് ഇറാൻ ആക്രമണം നടത്തിയത്.
ദുബായില് ഒരു മണിക്കൂറിനിടെ മൂന്നു സ്ഫോടനങ്ങളുണ്ടായി. ഖത്തറില് 12 സ്ഫോടനങ്ങള് ഉണ്ടായതായും റിപ്പോര്ട്ടുകളുണ്ട്. ഖമനെയിയുടെ വധത്തിനുശേഷം ഇതുവരെ കാണാത്ത തിരിച്ചടി നൽകുമെന്ന് ഇറാൻ വ്യക്തമാക്കിയിരുന്നു. ഇറാഖ് എര്ബിലിലെ യുഎസ് സൈനിക താവളത്തിനുനേരെയും ആക്രമണം ഉണ്ടായി.
ബഹ്റൈനില് അപകടസൈറണ് മുഴക്കിയിട്ടുണ്ട്. പുറത്തിറങ്ങുന്നവര് സേനാ താവളങ്ങള്ക്ക് സമീപത്തു കൂടിയുള്ള യാത്രകള് പരമാവധി ഒഴിവാക്കണമെന്ന് ജനങ്ങള്ക്ക് നിര്ദേശം നല്കിയിരിക്കുകയാണ് അധികൃതര്. ബഹറൈനില് 9 ഡ്രോണുകള് വർഷിക്കുകയും ദോഹയിൽ ശക്തമായ ആക്രമണം ഉണ്ടാവുകയും ചെയ്തു. ആളുകള് വീടുകളില് നിന്നും പുറത്തു ഇറങ്ങരുതെന്നും എല്ലാവരും ജാഗ്രതയോടെ വീടുകളില് തന്നെ കഴിയണമെന്ന് യുഎഇ അധികൃതര് നിര്ദേശിച്ചു.