ഗാസയില് ഒരു ഹമാസ്താന് ഉണ്ടാകാന് അനുവദിക്കില്ലെന്ന് ഇസ്രായേല് പ്രധാനമന്ത്രി ബെഞ്ചമിന് നെതന്യാഹു. ഗാസയില് 60 ദിവസത്തെ വെടിനിര്ത്തലിനായുള്ള അന്തിമ നിര്ദ്ദേശമെന്ന യുഎസ് പ്രസിഡന്റ് ഡൊണാള്ഡ് ട്രംപിന്റെ പ്രസ്താവനയ്ക്ക് പിന്നാലെയാണ് രൂക്ഷ ഭാഷയില് ഹമാസിനെ വിമര്ശിച്ച് ബെഞ്ചമിന് നെതന്യാഹു രംഗത്തെത്തിയത്.
യുദ്ധാനന്തര ഗാസയില് ഹമാസ് ഉണ്ടാകില്ലെന്ന് നെതന്യാഹു പറഞ്ഞു. ഒരു ഹമാസ്താന് ഉണ്ടാകാന് അനുവദിക്കില്ല. ഗാസയില് ഇനിയൊരു ഹമാസ് ഉണ്ടാകില്ല. നമുക്കൊരു തിരിച്ചുപോക്കില്ല. അത് അവസാനിച്ചു. എല്ലാ ബന്ദികളെയും മോചിപ്പിക്കും. ട്രാന്സ്-ഇസ്രയേല് പൈപ്പ്ലൈന് സംഘടിപ്പിച്ച യോഗത്തില് സംസാരിക്കുകയായിരുന്നു നെതന്യാഹു.
അതേസമയം ട്രംപ് മുന്നോട്ടുവെച്ച പുതിയ വെടിനിര്ത്തല് നിര്ദ്ദേശങ്ങള് ഹമാസ് മധ്യസ്ഥര് പരിശോധിക്കുകയാണ്. ഗാസയിലെ സംഘര്ഷം അവസാനിപ്പിക്കുകയും ഇസ്രായേല് സേനയെ മേഖലയില്നിന്ന് പിന്വലിക്കുന്നത് ഉറപ്പാക്കുകയും ചെയ്യുന്ന കരാറാണ് ഹമാസ് ലക്ഷ്യമിടുന്നത്.
ഗാസയില് വെടിനിര്ത്താന് യുഎസ് മുന്നോട്ട് വച്ച വ്യവസ്ഥകള് ഇസ്രായേല് അംഗീകരിച്ചെന്ന് ട്രംപ് കഴിഞ്ഞ ദിവസം വെളിപ്പെടുത്തുകയുണ്ടായി.
വെടിനിര്ത്തലിനാണ് ഇസ്രയേല് സമ്മതമറിയിച്ചതെന്നും ഈ കാലയളവില് യുദ്ധം അവസാനിപ്പിക്കാന് മറ്റുള്ളവരോടൊപ്പം താനും പ്രവര്ത്തിക്കുമെന്നും ട്രംപ് വ്യക്തമാക്കിയിരുന്നു.