ഡിജിറ്റല് കറന്സിയായ ക്രിപ്റ്റോ ഉപയോഗിച്ച് ഇനി ഇന്ധനം നിറയ്ക്കാം. യുഎഇയില് ആണ് പെട്രോള് സ്റ്റേഷനുകളില് ക്രിപ്റ്റോ കറന്സി ഉപയോഗിച്ചുള്ള സാമ്പത്തിക ഇടപാടുകള്ക്ക് തുടക്കം കുറിച്ചിരിക്കുന്നത്. ദുബായില് പത്ത് കേന്ദ്രങ്ങളിലാണ് ക്രിപ്റ്റോ കറന്സി ഉപയോഗിച്ച് പെട്രോള് സ്റ്റേഷനുകളില് നിന്ന് ഇന്ധനം നിറയ്ക്കാന് സാധിക്കുക.
യുഎഇയിലെ പ്രമുഖ എണ്ണക്കമ്പനിയായ എമിറാത്ത് ക്രിപ്റ്റോകറന്സി സേവനദാതാക്കളായ ക്രിപ്റ്റോ ഡോട്ട് കോമും സംയുക്തമായാണ് പദ്ധതി ആരംഭിച്ചിരിക്കുന്നത്. രാജ്യത്ത് ആദ്യമായാണ് പെട്രോള്സ്റ്റേഷനുകളില് ക്രിപ്റ്റോ കറന്സി ഇടപാടുകള് അനുവദിച്ചിരിക്കുന്നത്. ഇടപാടുകാര്ക്ക് ബിറ്റ്കോയിന് ഉള്പ്പെടെയുള്ള വിവിധ ക്രിപ്റ്റോ കറന്സികള് ഉപയോഗിച്ച് ഇടപാട് നടത്താം.
ക്രിപ്റ്റോ ഇടപാടുകള് ഉടന് തന്നെ മറ്റ് എമിറേറ്റ്സുകളിലേക്കും വ്യാപിപ്പിക്കുമെന്നാണ് റിപ്പോര്ട്ടുകള്. എമിറാത്തിന് ദുബൈയിലും വടക്കന് യുഎഇയിലുമായി 100 പെട്രോള് സ്റ്റേഷനുകളാണുള്ളത്. റീട്ടെയില് മേഖലയില് ക്രിപ്പ്റ്റോ ഉപയോഗിക്കുന്നതിന് ആക്കം കൂട്ടുകയാണ് ഇതുവഴി യുഎഇ സര്ക്കാര് ലക്ഷ്യമിടുന്നത്. എല്ലാ മേഖലകളിലും ക്രിപ്റ്റോ ഉപയോഗം സാധാരണമാക്കണമെന്നാണ് യുഎഇ സര്ക്കാരിന്റെ നയം.
ഡിജിറ്റല് കറന്സി ഉപയോഗം നിരീക്ഷിക്കാന് ദുബൈ ആസ്ഥാനമായി വിര്ച്വല് അസറ്റ് റെഗുലേറ്ററി അതോറിട്ടി പ്രവര്ത്തിക്കുന്നുണ്ട്. കൂടുതല് കമ്പനികള് ഈ സേവന മേഖലയിലേക്ക് കടന്നു വരുന്നതിനും സര്ക്കാര് നയം സഹായിക്കുന്നുണ്ട്.