പഹൽഗാമിലെ ഭീകരാക്രമണത്തെ അപലപിച്ച് കനേഡിയൻ പ്രധാനമന്ത്രി മാർക്ക് കാർനി. കാനഡയുടെ മൗനം പ്രതിഷേധത്തിനിടയാക്കിയ സാഹചര്യത്തിലാണ് പ്രതികരണം. ഭീകരാക്രമണം നടന്ന് മുപ്പത് മണിക്കൂറുകൾക്ക് ശേഷമാണ് മാർക്ക് കാർനി പ്രതികരിച്ചിരിക്കുന്നത്.
‘ജമ്മു കശ്മീരിലെ ഭീകരാക്രമണം എന്നെ ഞെട്ടിച്ചു. നിരപരാധികളായ സാധാരണക്കാരെയും വിനോദസഞ്ചാരികളും കൊലപ്പെടുത്തുകയും പരിക്കേൽപ്പിക്കുകയും ചെയ്തത് അർത്ഥശൂന്യവും ഞെട്ടലുളവാക്കുന്ന ഹിംസാത്മക പ്രവൃത്തിയുമാണ്. കാനഡ ഈ ഭീകരാക്രമണത്തെ ശക്തമായി അപലപിക്കുന്നു. ഭീകരാക്രമണത്തിന് ഇരകളായവരെയും അവരുടെ കുടുംബാംഗങ്ങളെയും അനുശോചനം അറിയിക്കുന്നു’ – മാർക്ക് കാർനി സമൂഹമാധ്യമത്തിൽ കുറിച്ചു.
അമേരിക്ക, റഷ്യ, ഗൾഫ് രാജ്യങ്ങൾ, അഫ്ഗാനിസ്ഥാനിലെ താലിബാൻ സർക്കാർ ഉൾപ്പെടെ ഭീകരാക്രമണത്തെ അപലപിച്ച് രംഗത്തെത്തിയപ്പോയും കാനഡ പ്രതികരിച്ചിരുന്നില്ല. ജി7 കൂട്ടായ്മയിലെ അംഗം കൂടിയായ കാനഡയുടെ മൗനം പ്രതിഷേധത്തിനിടയാക്കിയിരുന്നു. കനേഡിയൻ പ്രതിപക്ഷ നേതാവ് പിയേർ പൊളിയേവ് ഭീകരാക്രമണത്തെ അപലപിച്ചു രംഗത്തെത്തിയിരുന്നു. അതിന് പിന്നാലെ നാലര മണിക്കൂറിന് ശേഷമാണ് കാനഡ ഔദ്യോഗിക പ്രതികരണം നടത്തിയത്.