മൂര്‍ഖന്‍ പാമ്പിന്റെ തല വായിലാക്കി വീഡിയോ ചിത്രീകരിക്കുന്നതിനിടെ കടിയേറ്റ് 20കാരന് ദാരുണാന്ത്യം. തെലങ്കാനയിലെ കാമറെഡ്ഡി ജില്ലയിലെ ദേശായിപേട്ട് ഗ്രാമത്തില്‍ കഴിഞ്ഞ ദിവസമാണ് സംഭവം നടന്നത്. മോച്ചി ശിവരാജ് എന്ന യുവാവാണ് പാമ്പിന്റെ കടിയേറ്റ് മരിച്ചത്. പാമ്പ് പിടുത്തക്കാരനായ ഗംഗാറാമിന്റെ മകനാണ് മരിച്ച മോച്ചി ശിവരാജ്.
ദേശായ്‌പേട്ടില്‍ പാമ്പ് ശല്യത്തെ തുടര്‍ന്ന് പാമ്പ് പിടുത്തക്കാരനായ ഗംഗാറാമിനെ ഗ്രാമവാസികള്‍ വിവരം അറിയിച്ചിരുന്നു. ഗംഗാറാം മകനും പാമ്പിനെ പിടികൂടാന്‍ പരിശീലനം നല്‍കിയിരുന്നു. ഇതേ തുടര്‍ന്നാണ് ശിവരാജ് ഗ്രാമത്തിലെത്തിയത്. തുടര്‍ന്ന് രണ്ട് മീറ്ററോളം നീളം വരുന്ന മൂര്‍ഖനെ പിടികൂടിയ ശിവരാജ് പാമ്പിനെ ഉപയോഗിച്ച് ചിത്രങ്ങളും വീഡിയോകളും പകര്‍ത്താന്‍ തുടങ്ങി.
ഇതിനിടെ പാമ്പിന്റെ തല വായ്ക്കുള്ളിലാക്കി സാഹസ വീഡിയോ ചിത്രീകരിക്കുന്നതിനിടെ പാമ്പ് യുവാവിന്റെ നാവില്‍ കടിക്കുകയായിരുന്നു. ഇതോടെ ശിവരാജ് ബോധം നഷ്ടപ്പെട്ട് വീഴുകയായിരുന്നു. തുടര്‍ന്ന് ഉടന്‍തന്നെ ഇയാളെ ആശുപത്രിയില്‍ പ്രവേശിപ്പിച്ചെങ്കിലും ജീവന്‍ രക്ഷിക്കാനായില്ല.
