കാന്തപുരം എന്ത് കുന്തമെടുത്ത് എറിഞ്ഞാലും താന് പറയാനുള്ളത് പറയുമെന്നും മതപണ്ഡിതന്മാര് ഭരണത്തില് ഇടപെടുന്നുവെന്നും എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശന്. മുസ്ലിംകൂട്ടായ്മയായ മുസ്ലിംലീഗിനെ മതേതര പാര്ട്ടിയെന്നാണ് വിളിക്കുന്നതെന്ന് പരിഹസിച്ചുകൊണ്ടാണ് കഴിഞ്ഞ ദിവസം നടത്തിയ വര്ഗീയ പ്രസ്താവനയില് വിശദീകരണവുമായി എസ്എന്ഡിപി യോഗം ജനറല് സെക്രട്ടറി വെള്ളാപ്പള്ളി നടേശനെത്തിയത്. തന്നെ വേട്ടയാടുന്ന സ്ഥിതിവിശേഷമാണുള്ളതെന്നും കാന്തപുരം എന്ത് കുന്തമെടുത്തെറിഞ്ഞാലും പറയാനുള്ളത് താന് പറയുമെന്നും വെള്ളാപ്പള്ളി നടേശന് പറഞ്ഞു.
ജനറല് സെക്രട്ടറിയുടെ കസേരയിലിരുത്തിയ സമുദായത്തിന് വേണ്ടിയാണ് താനിതെല്ലാം പറയുന്നതെന്നും വെള്ളാപ്പള്ളി കൂട്ടിച്ചേര്ത്തു. സാമൂഹിക നീതിക്ക് വേണ്ടി സംസാരിക്കുന്ന തന്നെ വേട്ടയാടുകയാണെന്ന് എസ്എന്ഡിപി യോഗം കൊച്ചി യൂണിയന് സംഘടിപ്പിച്ച ആദരിക്കല് പരിപാടിയില് വെള്ളാപ്പള്ളി നടേശന് പറഞ്ഞു.
തനിക്ക് രാഷ്ട്രീയ മോഹങ്ങളില്ല. ഈഴവരുടെ ഭൂമി ന്യൂനപക്ഷങ്ങള് വാങ്ങിക്കൂട്ടുന്നു. ഭൂരിപക്ഷങ്ങള്ക്ക് ഒന്നുമില്ല. തന്നെ ജീവനോടെ കത്തിച്ചാലും പറയാനുള്ളത് പറയും. കാന്തപുരം അടക്കം മതപണ്ഡിതന്മാര് ഭരണത്തില് ഇടപെടുന്നു. ഞാനൊരു സാധാരണക്കാരനാണ്. പക്ഷേ, സാമൂഹ്യനീതിക്ക് വേണ്ടി ഞാന് പറയും. അത് ഇന്നും പറയും നാളെയും പറയും. എന്റെ കോലം കത്തിച്ചാലും കാന്തപുരം എന്ത് കുന്തമെടുത്തെറിഞ്ഞാലും ഞാന് പറയാനുള്ളത് പറയും. 24 മണിക്കൂറും ജാതി മാത്രം പറയുകയും ജാതിക്ക് വേണ്ടി പ്രവര്ത്തിക്കുകയും ചെയ്യുന്നവരാണ് എന്നെ ജാതിക്കോമരമെന്ന് പറയുന്നത്.
തന്നെ സമുദായം ഏല്പ്പിച്ച ഉത്തരവാദിത്തം നിറവേറ്റുന്നതില് കവിഞ്ഞ് അതിനപ്പുറത്തൊരു കസേരയും താനാഗ്രഹിച്ചിട്ടില്ലെന്നും വെള്ളിപ്പള്ളി നടേശന് പറഞ്ഞു. കേരളത്തില് നിന്ന് ഒമ്പത് എംപിമാരെയാണ് ഇടതും വലതുമായി നാമനിര്ദേശം ചെയ്തിട്ടുള്ളത്. അതില് പേരിനുപോലുമൊരു പിന്നാക്കക്കാരനില്ല. കേരളത്തിലെ മഹാഭൂരിപക്ഷം വരുന്ന പിന്നാക്ക വിഭാഗത്തിന് പരിഗണന കൊടുത്തില്ല എന്ന് പറഞ്ഞപ്പോള് മുസ്ലീങ്ങളെല്ലാം തനിക്കെതിരായ ഇറങ്ങി. നവോത്ഥാന സംരക്ഷണ സമിതിയില് നിന്ന് മാറ്റണമെന്നാണ് അവരുടെ ആവശ്യം. ഇവരാരുമല്ലല്ലോ എന്നെ അവിടെയിരുത്തിയതെന്ന് പറഞ്ഞ വെള്ളാപ്പള്ളി അതുകൊണ്ട് പോടാ പുല്ലെയെന്ന് ഞാനും പറഞ്ഞെന്നാണ് പറയുന്നത്.
ഈഴവരുടെ സംഘടിതശക്തിയെ തകര്ക്കാനുള്ള ശ്രമങ്ങളാണ് നടക്കുന്നത്. ജനാധിപത്യത്തില് നമുക്കും വേണ്ടെ അധികാരത്തിലുള്ള അവകാശം. അത് ഇടതുപക്ഷവും, വലതുപക്ഷവും തന്നില്ലെങ്കില് അത് തുറന്നുപറഞ്ഞ താന് വര്ഗീയവാദിയാണോയെന്നും വെള്ളാപ്പള്ളി ചോദിച്ചു. പറയാതിരുന്നാല് ഇതൊക്കെ ആരാണ് തരാന് പോകുന്നതെന്നും വെള്ളാപ്പള്ളി ചോദിക്കുന്നു. പിണറായി വിജയന് ശേഷം ഈഴവനായ ഒരാള് കേരള മുഖ്യമന്ത്രിയാകാന് സാധ്യതകാണുന്നില്ലെന്നും വെള്ളാപ്പള്ളി പറഞ്ഞു.