ലഖിംപൂര് ഖേരിയില് കര്ഷകര് കൊല്ലപ്പെട്ട സംഭവത്തില് പ്രതികരിച്ച് ബിജെപി എം.പി. വരുണ്ഗാന്ധി. പ്രതിഷേധക്കാരെ കൊല ചെയ്ത് നിശ്ശബ്ദമാക്കാനാകില്ല എന്ന് വരുണ് ഗാന്ധി തുറന്നടിച്ചു.
കര്ഷകര്ക്കിടയിലേക്ക് കേന്ദ്രമന്ത്രി അജയ് മിശ്രയുടെ മകന്റെ വാഹനം ഇടിച്ചുകയറുന്ന വീഡിയോ പങ്കുവെച്ചുകൊണ്ടായിരുന്നു വരുണ് ഗാന്ധിയുടെ പ്രതികരണം. വീഡിയോയില് നിന്ന് എല്ലാം വ്യക്തമാണെന്ന് അദ്ദേഹം പറഞ്ഞു.
പ്രതിഷേധക്കാരെ കൊല ചെയ്ത് നിശ്ശബ്ദമാക്കാനാകില്ല. ക്രൂരതയും അഹന്തയും പ്രതിഫലിക്കുന്ന ഈ ദൃശ്യങ്ങള് ഓരോ കര്ഷകന്റെയും മനസ്സിലേക്ക് വ്യാപിക്കുന്നതിന് മുമ്പ് നിരപരാധികളായ കര്ഷകരുടെ ചോര വീഴ്ത്തിയവര് ഉത്തരവാദിത്വം ഏല്ക്കണം. അവര്ക്ക് നീതി ലഭ്യമാകണം.’- വരുണ് ഗാന്ധി ട്വിറ്ററില് കുറിച്ചു.
ലഖിംപൂരിലെ കര്ഷക കൊലയ്ക്ക് പിന്നില് കേന്ദ്രമന്ത്രി അജയ് മിശ്രയുടെ മകന് ആശിഷ് മിശ്രയ്ക്കെതിരെ എഫ്.ഐ.ആര് എടുത്തതിന് പിന്നാലെയാണ് വരുണ് ഗാന്ധിയുടെ പ്രതികരണം. കര്ഷകരെ ഇടിച്ചുകൊന്ന വാഹനത്തിനുള്ളില് ആശിഷ് മിശ്ര ഉണ്ടായിരുന്നെന്നാണ് എഫ്.ഐ.ആറില് റിപ്പോര്ട്ട് ചെയ്തിരിക്കുന്നത്.