ഉള്ളുലയ്ക്കുന്ന കാഴ്ചയാണ് പശ്ചിമബംഗാളില് നിന്നും റിപ്പോര്ട്ടു ചെയ്യുന്നത്. റയില്പാളം മുറിച്ചു കടക്കുന്നതിനിടെ ആനയെ ട്രെയിന് ഇടിച്ചുതെറിപ്പിച്ചു. ഗുരുതരപരുക്കേറ്റ്, ചോരയൊലിച്ച ആന ട്രാക്കില് നിന്നും ഇഴഞ്ഞുമാറുന്ന ദൃശ്യം കണ്ണുനിറയിക്കുന്നതാണ്. ആനയെ ഇടിച്ച ട്രെയിനിന്റെ എന്ജിനും തകര്ന്നു. സിലിഗുരി ദുബ്രി ഇന്റര്സിറ്റി എക്സ്പ്രസാണ് പാളം മുറിച്ച് കടന്ന കാട്ടാനയെ ഇടിച്ചത്. ഇടിയുടെ ആഘാതത്തില് എഴുന്നേറ്റ് നില്ക്കാനാവാത്ത ആന ഇഴഞ്ഞാണ് മാറിയത്.
ബാനര്ഹട്ട് നാഗ്രകട്ട പാതയില് ട്രെയിനിടിച്ച് ആനകള് ചരിയുന്നതും പരുക്കേല്ക്കുന്നതും സ്ഥിരം സംഭവമാണ്. ഒട്ടേറെ ആനത്താരകളെ മുറിച്ച് കടന്നാണ് പശ്ചിമബംഗാളിലെ ദുവാറിലേക്കുള്ള ട്രെയിന് ട്രാക്കുകള് പോവുന്നത്. ദേഹമാകെ ചോരയൊലിച്ച് മുന്കാലുകളില് ബലം കൊടുത്ത് ഇഴഞ്ഞുനീങ്ങിയാണ് കാട്ടാന പാളത്തില് നിന്നും മാറിയത്. പിന്നീട് ദേഹമാകെ പരുക്കുകളോടെ ആനയെ സമീപത്ത് നിന്ന് കണ്ടെത്തി.
കാട്ടാനകളെ നിരന്തരം അപകടത്തിലാക്കുന്നതായി കണ്ടെത്തിയതോടെ ഈ പാതയിലെ ട്രെയിനുകളുടെ വേഗത മണിക്കൂറില് 25 കിലോമീറ്ററായി 2015-2016ല് പരിമിതപ്പെടുത്തിയിരുന്നു. എന്നാല് അപകടങ്ങള് കുറയാന് തുടങ്ങിയതോടെ വേഗപരിമിതി 50കിലോമീറ്ററായി ഉയര്ത്തിയതായും റിപ്പോര്ട്ടുകള് പുറത്തുവരുന്നുണ്ട്.