രാജ്യത്തെ നടുക്കിയ പൊള്ളാച്ചി പീഡന കേസിനെക്കുറിച്ചും നടി നയന്താരയെ കുറിച്ചും വിവാദ പരാമര്ശം നടത്തിയ നടന് രാധാ രവിയെ ഡി.എം.കെ സസ്പെന്ഡ് ചെയ്തു. പാര്ട്ടിയുടെ പ്രാഥമിക അംഗത്വത്തില് നിന്നും രാധാ രവിയെ സസ്പെന്ഡ് ചെയ്യുന്നതായി ഡി.എം.കെ ജനറല് സെക്രട്ടറി കെ. അന്പഴകന് പുറത്തിറക്കിയ വാര്ത്താക്കുറിപ്പില് വ്യക്തമാക്കി.
നയന്താര പ്രധാനവേഷത്തില് എത്തുന്ന കൊലയുതിര് കാലം എന്ന സിനിമയുടെ പ്രചരണ ചടങ്ങില് പങ്കെടുക്കവെയാണ് രാധാ രവിയുടെ വിവാദ പരാമര്ശം. ഇപ്പോള് എല്ലാവരുടെയും കയ്യില് മൊബൈല് ഫോണുണ്ട്. അതുകൊണ്ട് എന്തും എവിടെയും വച്ച് ആളുകള്ക്ക് ഷൂട്ട് ചെയ്യാം. വലിയ ക്യാമറയുടെ ആവശ്യമില്ല. പൊള്ളാച്ചിയില് ആരോ ബലാത്സംഗത്തിന് ഇരയായെന്നും ആ ദൃശ്യങ്ങള് സാമൂഹിക മാധ്യമങ്ങളില് ചോര്ന്നുവെന്നും ഞാന് കേട്ടു. പലരും അത് കാണരുത് എന്ന് പറയുന്നത് കേട്ടു. പക്ഷേ ആളുകള് മറ്റെന്തു കാണും- രാധാ രവി പറഞ്ഞിരുന്നു.
പൊള്ളാച്ചി പീഡനത്തെ ബിഗ് ബജറ്റ് സിനിമകളുമായി രാധാ രവി താരതമ്യം ചെയ്യുകയും ചെയ്തു. ഒരു സ്മോള് ബജറ്റ് സിനിമ എന്ന് പറഞ്ഞാല് ഒരു ആണ്കുട്ടി ഒരു പെണ്കുട്ടിയെ ബലാത്സംഗം ചെയ്യുന്ന പോലെയാണ്. എന്നാല് ബിഗ് ബജറ്റ് സിനിമ എന്ന് പറഞ്ഞാല് പൊള്ളാച്ചിയിലെ സംഭവം പോലെ 40 സ്ത്രീകള് പീഡിപ്പിക്കപ്പെട്ട പോലെയാണ്. അതാണ് വ്യത്യാസം.”എന്നായിരുന്നു രാധാ രവിയുടെ പരാമര്ശം.
പ്രചരണ പരിപാടിയില് പങ്കെടുക്കാന് എത്താതിരുന്ന നയന്താരയ്ക്കെതിരേയായിരുന്നു രാധാ രവിയുടെ അടുത്ത ആക്രമണം. നയന്താരയെ രജനികാന്ത്, ശിവാജി ഗണേശന്, എം.ജി.ആര് എന്നിവരുമായി താരതമ്യം ചെയ്യരുത്. അവര് മഹാത്മാക്കളാണ്. അവരുടെ വ്യക്തിജീവിതത്തില് ഇത്രമാത്രം സംഭവങ്ങള് ഉണ്ടായിട്ടും നയന്താര സിനിമയില് ഇപ്പോഴും നില്ക്കുന്നു. അതിന് കാരണം മറ്റൊന്നുമല്ല തമിഴ്നാട്ടുകാര് എല്ലാം പെട്ടന്ന് മറക്കും. തമിഴ്സിനിമയില് അവര് പിശാചായി അഭിനയിക്കുന്നു അതേ സമയം തെലുങ്കില് സീതയായും. എന്റെ ചെറുപ്പകാലത്ത് കെ.ആര് വിജയെപ്പോലുള്ള നടിമാരെയാണ് സീതയാക്കുന്നത്. അഭിനയിക്കുന്നവരുടെ സ്വഭാവം എന്ത് തന്നെയായാലും ഇന്ന് കുഴപ്പമില്ല, ആര്ക്കും ഇവിടെ സീതയാകാം”- എന്നായിരുന്നു രാധാ രവി പറഞ്ഞത്. ഇതിന് പിന്നാലെ രാധാരവിക്കെതിരെ സോഷ്യല് മീഡിയയില് കടുത്ത വിമര്ശനം ഉയര്ന്നിരുന്നു.