ജമ്മു കശ്മീരിലെ പഹല്ഗാമില് ഉണ്ടായ ഭീകരാക്രമണത്തിന്റെ പശ്ചാത്തലത്തില് സൗദി യാത്ര വെട്ടിച്ചുരുക്കി മോദി പറന്ന് എത്തിയത് പാക്കിസ്ഥാന്റെ വ്യോമാതിര്ത്തി ഒഴിവാക്കി. സൗദിയിലേക്ക് പോയപ്പോള് പാക്ക് വ്യോമാതിര്ത്തിയിലൂടെയാണ് പ്രധാനമന്ത്രി പറന്നത്. എന്നാല്, തിരിച്ചെത്തിയപ്പോള് പ്രധാനമന്ത്രിയുടെ എയര്ഫോഴ്സ് വണ് ഇത് പൂര്ണമായും ഒഴിവാക്കി.
ഡല്ഹിയിലേക്ക് മടങ്ങിയെത്തിയ പ്രധാനമന്ത്രി വിമാനത്താളത്തില് അടിയന്തര യോഗം ചേര്ന്നു. അജിത് ഡോവല് , എസ് ജയശങ്കര് അടക്കമുള്ളവര് യോഗത്തില് പങ്കെടുത്തു. വിദേശകാര്യ സെക്രട്ടറി വിക്രം മിസ്രിയും യോഗത്തില് പങ്കെടുത്തു. സൗദി കിരീടാവകാശി മുഹമ്മദ് ബിന് സല്മാന് രാജകുമാരനുമായുള്ള കൂടിക്കാഴ്ചയ്ക്ക് ശേഷമായിരുന്നു പ്രധാനമന്ത്രിയുടെ മടക്കം. ഭീകരാക്രമണത്തെ ശക്തമായി അപലപിച്ച മുഹമ്മദ് ബിന് സല്മാന് രാജകുമാരന്രംഗത്തെത്തി. സംഭവത്തില് അഗാധമായ ദുഃഖം രേഖപ്പെടുത്തുകയും സഹായങ്ങള് വാഗ്ദാനം ചെയ്യുകയും ചെയ്തതായി ഇന്ത്യന് സ്ഥാനപതി ഡോ. സുഹൈല് അജാസ് ഖാന് അറിയിച്ചു. പ്രധാനമന്ത്രിയോടൊപ്പം വിദേശകാര്യ മന്ത്രി എസ്. ജയശങ്കര് ഉള്പ്പെടെയുള്ള സംഘവും ഇന്ത്യയിലേക്ക് മടങ്ങിയിരുന്നു.
ഭീകരാക്രമണ വാര്ത്ത വിവരം പുറത്തുവന്നതിന് പിന്നാലെ പ്രധാനമന്ത്രി അടിയന്തര ഇടപെടലുകള് നടത്തിയിരുന്നു. അഭ്യന്തര മന്ത്രി അമിത് ഷായെ ശ്രീനഗറിലേക്ക് അയയ്ക്കുകയും സ്ഥിതിഗതികളുടെ വിലയിരുത്തല് നടത്താന് നിര്ദേശിക്കുകയും ചെയ്തിരുന്നു. ഇതിന് പിന്നാലെയാണ് അമിത് ഷായുടെ നേതൃത്വത്തില് ശ്രീനഗറില് ഉന്നതതലയോഗം ചേര്ന്നതും സുരക്ഷാ ഏജന്സി മേധാവികളുമായി അമിത് ഷാ ചര്ച്ച നടത്തിയതും.
പഹല്ഗാം ഭീകരാക്രമണത്തിന്റെ പശ്ചാത്തലത്തില് വിനോദ സഞ്ചാരികളെ സുരക്ഷിത സ്ഥാനങ്ങളിലേക്ക് മാറ്റാനായി എയര് ഇന്ത്യയും ഇന്ഡിഗോയും ശ്രീനഗറില് നിന്ന് അധിക വിമാന സര്വീസുകള് നടത്തും. വിനോദ സഞ്ചാരികള്ക്കും ദുരിതം അനുഭവിക്കുന്നവര്ക്കുമായി പ്രത്യേക ഹെല്പ്ഡെസ്ക്കുകള് ആരംഭിച്ചിട്ടുണ്ട്. അനന്ത്നാഗ്: 01932222337, 7780885759, 9697982527, 6006365245. ശ്രീനഗര്: 01942457543, 01942483651,7006058623
പഹല്ഗാമിലെ ബൈസരണില് ഭീകരാക്രമണത്തില് ഒരു മലയാളിയടക്കം 28 പേരാണ് കൊല്ലപ്പെട്ടത്. എറണാകുളം ഇടപ്പള്ളി സ്വദേശി എന്. രാമചന്ദ്രന് ആണ് കൊല്ലപ്പെട്ട മലയാളി.
കൊല്ലപ്പെട്ടവരിലേറെയും വിനോദസഞ്ചാരികളാണ്. രണ്ടു വിദേശികളും നാട്ടുകാരായ രണ്ടു പേരും കൊല്ലപ്പെട്ടവരില് ഉള്പ്പെടുന്നു. ഇരുപതിലേറെ പേര്ക്കു പരിക്കേറ്റു. ജമ്മു കാഷ്മീരില് അടുത്ത നാളില് നാട്ടുകാര്ക്കു നേര്ക്കുണ്ടായ ഏറ്റവും വലിയ ആക്രമണമാണിത്.
കൊല്ലപ്പെട്ടവരില് ഒരു മലയാളിയുമുണ്ട്. എറണാകുളം ഇടപ്പള്ളി സ്വദേശി എന്. രാമചന്ദ്രനാണ് മരിച്ചത്. ചൊവ്വാഴ്ച ഉച്ചയ്ക്ക് രണ്ടരയോടെയാണ് ആക്രമണമുണ്ടായത്. ലഷ്കറെ തൊയ്ബ അനുകൂല സംഘടനായ ദ റെസിസ്റ്റന്സ് ഫ്രണ്ട്-ടിആര്എഫ് ആക്രമണത്തിന്റെ ഉത്തരവാദിത്തം ഏറ്റെടുത്തിട്ടുണ്ട്.