പ്രധാനമന്ത്രി നരേന്ദ്ര മോദി നിരക്ഷരനും അജ്ഞനുമാണെന്ന് മോദിയുടെ രാജ്യസഭാ പ്രസംഗത്തിന് ശേഷം തെലങ്കാന കോൺഗ്രസ് അധ്യക്ഷൻ അനുമൂല രേവന്ത് റെഡ്ഡി. രാജ്യസഭയിൽ നന്ദി പ്രമേയത്തിന് പ്രധാനമന്ത്രിയുടെ മറുപടിക്ക് ശേഷം തെലങ്കാന പ്രദേശ് കോൺഗ്രസ് കമ്മിറ്റി (ടിപിസിസി) ചൊവ്വാഴ്ച സംസ്ഥാനത്തുടനീളം പ്രതിഷേധിക്കുകയും പ്രധാനമന്ത്രി നരേന്ദ്ര മോദിയുടെ കോലം കത്തിക്കുകയും ചെയ്തു.
പ്രസംഗത്തിനിടെ അടിസ്ഥാനരഹിതവും അപ്രസക്തവുമായ പരാമർശങ്ങൾ നടത്തി പ്രധാനമന്ത്രി നരേന്ദ്ര മോദി തെലങ്കാനയിലെ ജനങ്ങളെ അവഹേളിച്ചു എന്ന് തെലങ്കാന പ്രദേശ് കോൺഗ്രസ് കമ്മിറ്റി സംസ്ഥാന ഘടകം അധ്യക്ഷനും എംപിയുമായ അനുമൂല രേവന്ത് റെഡ്ഡി ആരോപിച്ചു.
“നരേന്ദ്ര മോദി നിരക്ഷരനും ഈ നടപടിക്രമങ്ങളെക്കുറിച്ച് തീർത്തും അജ്ഞനുമാണ്. എബിസിഡി പോലും വായിക്കാൻ അദ്ദേഹത്തിന് കഴിവുണ്ടോ എന്ന് എനിക്ക് സംശയമുണ്ട്,” റെഡ്ഡി പറഞ്ഞു.
പ്രധാനമന്ത്രി നരേന്ദ്രമോദി തന്റെ പ്രസംഗത്തിൽ മുൻ പ്രധാനമന്ത്രിമാരായ ജവഹർലാൽ നെഹ്‌റുവിനേയും ഇന്ദിരാഗാന്ധിയേയും ആക്ഷേപിച്ചു എന്ന് ആരോപിച്ച് പ്രതിപക്ഷം ചൊവ്വാഴ്ച രാജ്യസഭയിൽ നിന്ന് ഇറങ്ങിപ്പോയി. പ്രധാനമന്ത്രിയുടെ പ്രസംഗത്തോട് പ്രതികരിച്ച് കോൺഗ്രസ് നേതാവ് രാഹുൽ ഗാന്ധി വീണ്ടും ‘രണ്ട് ഇന്ത്യ’ വിഷയം ഉന്നയിച്ചു.
