മധ്യപ്രദേശിലെ എംബിബിഎസ് വിദ്യാർത്ഥികളെ ഒന്നാം വർഷ ഫൗണ്ടേഷൻ കോഴ്സിന്റെ ഭാഗമായി ആർഎസ്എസ് സ്ഥാപകൻ കെബി ഹെഡ്ഗേവാർ, ഭാരതീയ ജനസംഘം നേതാവ് ദീനദയാൽ ഉപാധ്യായ, സ്വാമി വിവേകാനന്ദൻ, ബിആർ അംബേദ്കർ എന്നിവരെ കുറിച്ച് പഠിപ്പിക്കും. വിദ്യാർത്ഥികളിൽ സാമൂഹികവും വൈദ്യശാസ്ത്രപരവുമായ നൈതികത വളർത്തുക എന്ന ലക്ഷ്യത്തോടെ ആണ് ഇതെന്ന് സംസ്ഥാന വിദ്യാഭ്യാസ മന്ത്രി വിശ്വാസ് സാരംഗ് പറഞ്ഞു.
ആയുർവേദ ആചാര്യനായി കരുതപ്പെടുന്ന മഹർഷി ചരകനെയും ഇന്ത്യയിലെ ശസ്ത്രക്രിയയുടെ പിതാവ് എന്ന് പറയപ്പെടുന്ന സുശ്രുത് മുനിയെ കുറിച്ചും ഒന്നാം വർഷ എംബിബിഎസ് വിദ്യാർത്ഥികൾ പഠിക്കുമെന്നും മന്ത്രി പറഞ്ഞു. എംബിബിഎസ് വിദ്യാർത്ഥികൾക്കുള്ള അടുത്ത അക്കാദമിക് സെഷൻ ഈ വർഷം അവസാനത്തോടെ ആരംഭിക്കാൻ സാദ്ധ്യ തയുണ്ട്.
“ധാർമ്മിക മൂല്യങ്ങൾ എംബിബിഎസ് ഫൗണ്ടേഷൻ കോഴ്സിന്റെ ആദ്യ വർഷത്തിൽ വിദ്യാർത്ഥികൾ പഠിക്കണമെന്ന് ദേശീയ മെഡിക്കൽ കൗൺസിൽ (എൻഎംസി) പറഞ്ഞിട്ടുണ്ട്. അതിനാൽ വിദ്യാർത്ഥികളുടെ സ്വഭാവം വളർത്തിയെടുക്കാൻ ഈ മഹത് വ്യക്തികളെ പഠനത്തിൽ ഉൾപ്പെടുത്താൻ ഞങ്ങൾ ആലോചിച്ചു,” മന്ത്രി പറഞ്ഞു.
സർജൻ ആയിരുന്ന കേശവ് ബലിറാം ഹെഡ്ഗേവാർ ഹിന്ദുത്വ പ്രത്യയശാസ്ത്രത്തെ അടിസ്ഥാനമാക്കി 1925 ൽ നാഗ്പൂരിൽ രാഷ്ട്രീയ സ്വയം സേവക് സംഘം സ്ഥാപിച്ചു. ബിജെപിയുടെ മുൻഗാമിയായ ഭാരതീയ ജനസംഘത്തിന്റെ പ്രമുഖ നേതാക്കളിൽ ഒരാളായിരുന്നു ദീനദയാൽ ഉപാധ്യായ.
“ആർഎസ്എസിന്റെ ആദ്യ മേധാവി ഹെഡ്ഗേവാർ, ദീനദയാൽ ഉപാധ്യായ, സ്വാമി വിവേകാനന്ദൻ, ബിആർ അംബേദ്കർ എന്നീ മഹത് വ്യക്തികൾ വലിയ ദാർശനികരായിരുന്നു. അവരുടെ ജീവിതം മൂല്യങ്ങളിൽ അധിഷ്ഠിതമായിരുന്നു. അവരുടെ ചിന്തകളും പെരുമാറ്റവും വ്യക്തിത്വവും പ്രചോദനകരമാണ്,” മന്ത്രി പറഞ്ഞു.
“ഇന്ത്യയുടെ സ്വാതന്ത്ര്യ സമരത്തിൽ കെ ബി ഹെഡ്ഗേവാർ സജീവമായി പങ്കെടുത്തിട്ടുണ്ടെന്ന് മന്ത്രി പറഞ്ഞു. ദരിദ്രരിൽ ദരിദ്രരായവരെ സഹായിക്കുന്നതിനായി ദീനദയാൽ ഉപാധ്യായയുടെ ‘അന്ത്യോദയ’ എന്ന ആശയം മാതൃകാപരമായിരുന്നു. ഇന്ത്യൻ ദർശനം ലോകത്തെ അറിയിക്കാൻ സ്വാമി വിവേകാനന്ദൻ ദൂരദേശങ്ങളിൽ സഞ്ചരിച്ചു. ബി ആർ അംബേദ്കർ ഒരു പാവപ്പെട്ട കുടുംബത്തിലാണ് ജനിച്ചത്, പക്ഷേ അദ്ദേഹം നമ്മുടെ ഭരണഘടന രൂപീകരിച്ചു. വരുന്ന അക്കാദമിക് സെഷൻ (2021) മുതൽ ഈ മഹത് വ്യക്തികളുടെ പ്രചോദനാത്മകമായ ജീവിതത്തെക്കുറിച്ച് (എംബിബിഎസ്) വിദ്യാർത്ഥികളെ പഠിപ്പിക്കാൻ ഞങ്ങൾ തീരുമാനിച്ചു,” മന്ത്രി വിശ്വാസ് സാരംഗ് കൂട്ടിച്ചേർത്തു.
എംബിബിഎസ് കോഴ്സിന്റെ സിലബസ് തീരുമാനിക്കുന്നത് എൻഎംസിയാണ്. എന്നാൽ ഫൗണ്ടേഷൻ കോഴ്സ് വിഷയത്തിന്റെ ഉള്ളടക്കം തയ്യാറാക്കാൻ സംസ്ഥാനങ്ങളിലെ വിദ്യാഭ്യാസ വകുപ്പിന് അധികാരമുണ്ടെന്ന് മെഡിക്കൽ ഫ്രറ്റേണിറ്റി വൃത്തങ്ങൾ പറഞ്ഞു.