ഡൽഹിയിലെ കർക്കർഡൂമ കോടതി സമുച്ചയത്തിലെ 66-ാം നമ്പർ കോടതി മുറിയിൽ ബോളിവുഡ് സിനിമകളെ വെല്ലുന്ന രംഗങ്ങളാണ് ഏതാനും ദിവസങ്ങൾക്ക് മുമ്പ് അരങ്ങേറിയത്.
കോടതി തനിക്ക് നീതി നൽകുന്നില്ലെന്നും വാദം കേൾക്കാനുള്ള തീയതികൾ മാത്രമാണ് നൽകുന്നത് എന്നും ആരോപിച്ചു രാകേഷ് എന്ന കക്ഷി കോടതി മുറിയിൽ പ്രശ്നം സൃഷ്ട്ടിക്കുകയായിരുന്നു. ഡൽഹിയിലെ ശാസ്ത്രി നഗർ നിവാസിയായ രാകേഷ് ഒരു കേസുമായി ബന്ധപ്പെട്ട് 2016 മുതൽ കർക്കർഡൂമ കോടതിയിൽ കയറി ഇറങ്ങുകയാണ്.
എന്നാൽ നാളുകയിട്ടും കേസിൽ തീർപ്പ് ഉണ്ടാവാത്തതിനെ തുടർന്ന് രോക്ഷാകുലനായ് ഇദ്ദേഹം ബോളിവുഡ് നടൻ സണ്ണി ഡിയോളിന്റെ “തരീഖ് പാർ തരീഖ്” (നാളെ നാളെ നീളെ നീളെ ) എന്ന പ്രശസ്തമായ സിനിമ ഡയലോഗ് പറഞ്ഞ് പൊതുമുതൽ നശിപ്പിക്കുകയായിരുന്നു.
ജൂലൈ 17 നാണ് സംഭവം. കർക്കർഡൂമ കോടതിയിൽ ഹാജരായ രാകേഷ് കേസിൽ വാദം കേൾക്കുന്നതിനിടെ “ദാമിനി” എന്ന ബോളിവുഡ് ചിത്രത്തിലെ “തരീഖ് പാർ തരീഖ്” എന്ന സിനിമ ഡയലോഗ് പറയുകയും കോടതി മുറിയിലെ ഫർണിച്ചറുകളും കമ്പ്യൂട്ടറുകളും നശിപ്പിക്കുകയും ചെയ്തു.
കോടതി മുറിക്കുള്ളിൽ ജഡ്ജിയുടെ ഡയസും രാകേഷ് തകർത്തതായി വാർത്താ ഏജൻസി എ.എൻ.ഐ റിപ്പോർട്ട് ചെയ്തു. ഇതേതുടർന്ന് രാകേഷിനെ പൊലീസ് അറസ്റ്റ് ചെയ്യുകയും ഫർഷ്ബസാർ പൊലീസ് സ്റ്റേഷനിൽ കേസ് രജിസ്റ്റർ ചെയ്ത ശേഷം മജിസ്ട്രേറ്റിന് മുന്നിൽ ഹാജരാക്കുകയും ചെയ്തു.