മലയാളികൾക്ക് ഓണാശംസകളുമായി തമിഴ്നാട് മുഖ്യമന്ത്രി എം കെ സ്റ്റാലിൻ. മലയാളത്തിലാണ് സ്റ്റാലിന്റെ ഓണാശംസകള്. ”മാവേലിയുടെ നാട് പോലെ ഒരുമയും സമത്വവും വീണ്ടും ഉണ്ടാവണം. എല്ലാവരെയും ഒരു പോലെ കാണുന്ന കേന്ദ്ര സര്ക്കാര് വരണം. നമുക്ക് ഒന്നിച്ച് നില്ക്കാം. പ്രിയപ്പെട്ട മലയാളികള്ക്ക് ഹൃദയം നിറഞ്ഞ ഓണാശംസകള്.”-സ്റ്റാലിന് പറഞ്ഞു.
ഭാഷാടിസ്ഥാനത്തിൽ നമ്മൾ സഹോദരങ്ങളാണെന്നും തെക്കെയിന്ത്യയിലെ പുരോഗമന ആശയങ്ങൾ രാജ്യം മുഴുവനും പടരുന്ന വർഷമാകട്ടെയെന്നും എം കെ സ്റ്റാലിൻ നേരത്തെ ആശംസിച്ചിരുന്നു.രാഷ്ട്രപതി ദ്രൗപതി മുർമ്മുവും മലയാളികൾക്ക് ഓണം ആശംസിച്ചിരുന്നു.
അതേ സമയം കേരള മുഖ്യമന്ത്രി പിണറായി വിജയനും എല്ലാവർക്കും ഓണാശംസകൾ നേർന്നു.സമഭാവനയുടെ സന്ദേശമാണ് ഓണം പകർന്നു നൽകുന്നതെന്ന് മുഖ്യമന്ത്രി അഭിപ്രായപ്പെട്ടു.മാനുഷികമായ മൂല്യങ്ങൾ എല്ലാം മനസ്സിൽ ആവർത്തിച്ച് ഉറപ്പിക്കുന്ന ശാന്തിയുടെ, സമൃദ്ധിയുടെ, ഐശ്വര്യത്തിന്റെ, വികസനത്തിന്റെ, ആഘോഷമാവട്ടെ ഓണമെന്നും കേരളത്തിന്റെ ഈ ദേശീയോത്സവം ജാതിമത വേർതിരിവുകൾക്കൊക്കെ അതീതമായ മാനവിക ഐക്യം ഊട്ടിയുറപ്പിച്ചുകൊണ്ട് നമുക്ക് ആഘോഷിക്കാമെന്നും മുഖ്യമന്ത്രി ആശംസിച്ചു.