കേരളത്തില്‍ ജനവാസ മേഖലയിലെത്തുന്ന പാമ്പുകളെ പിടികൂടി അവയ്ക്കിണങ്ങുന്ന ആവാസ വ്യവസ്ഥയില്‍ ഉപേക്ഷിക്കുന്ന വാവ സുരേഷിന് ആരാധകര്‍ ഏറെയാണ്. ഇത്തരത്തില്‍ വീട്ടിലെത്തിയ അതിഥിയെ പിടികൂടി ആളൊഴിഞ്ഞ സ്ഥലത്ത് ഉപേക്ഷിക്കുന്ന ഒരു വീഡിയോയാണ് ഇന്‍സ്റ്റാഗ്രാം ഉള്‍പ്പെടെയുള്ള സോഷ്യല്‍ മീഡിയകളില്‍ വൈറലായിരിക്കുന്നത്.
പാമ്പിനെ പിടികൂടുന്ന നിരവധി വീഡിയോകള്‍ നിരന്തരം സോഷ്യല്‍ മീഡിയകളില്‍ എത്താറുണ്ടെങ്കിലും സാരി ധരിച്ചെത്തിയ യുവതി പാമ്പിനെ പിടിക്കുന്ന വീഡിയോ ഇതോടകം വൈറലായി കഴിഞ്ഞു. സുരക്ഷാ ഉപകരണങ്ങള്‍ ഒന്നുമില്ലാതെ കൈകൊണ്ട് പാമ്പിനെ പിടിച്ച യുവതി കുറച്ച് സമയം പാമ്പിനെ കൈയിലെടുത്ത് അഭ്യാസ പ്രകടനങ്ങള്‍ നടത്തുന്നതും കാണാം.
തുടര്‍ന്ന് പ്ലാസ്റ്റിക് ചാക്കിലാക്കിയ പാമ്പിനെ ആളൊഴിഞ്ഞ സ്ഥലത്ത് ഉപേക്ഷിക്കുന്നുണ്ട്. നിരവധി പേരാണ് വീഡിയോയിലുള്ള പെണ്‍കുട്ടിയെ അഭിനന്ദിച്ചും വിമര്‍ശിച്ചും രംഗത്തെത്തിയിട്ടുള്ളത്. ചിലര്‍ യുവതിയുടെ ധൈര്യത്തെ പുകഴ്ത്തിയപ്പോള്‍ മറ്റ് ചിലര്‍ ഇവരെ വിമര്‍ശിച്ചാണ് രംഗത്തെത്തുന്നത്.
സുരക്ഷാ ഉപകരണങ്ങളില്ലാതെ ഇത്തരത്തില്‍ പാമ്പിനെ പിടിക്കാന്‍ പാടില്ലെന്നും വിമര്‍ശനം ഉയരുന്നുണ്ട്. അതേസമയം ചേരയാണ് പെണ്‍കുട്ടിയുടെ വീഡിയോയിലുള്ള പാമ്പ്. ഇവള്‍ നാഗകന്യകയോ എന്ന തരത്തിലുള്ള കമന്റുകളും നിരവധിയാണ്.