കര്‍ണാടക കോണ്‍ഗ്രസില്‍ ഡികെ ശിവകുമാര്‍-സിദ്ധരാമയ്യ പക്ഷങ്ങള്‍ പരസ്യ പോരിലേക്ക്. ലോക്‌സഭ തിരഞ്ഞെടുപ്പിന് ശേഷം ഭരണമാറ്റം ആവശ്യപ്പെട്ടാണ് ഡികെ ശിവകുമാര്‍ പക്ഷം രംഗത്തെത്തിയിരിക്കുന്നത്. ഡികെ ശിവകുമാറിനെ മുഖ്യമന്ത്രിയാക്കണമെന്ന് ആവശ്യപ്പെട്ട് ചന്നാഗിരി എംഎല്‍എ ബസവരാജു ശിവഗംഗ സിദ്ധരാമയ്യ സ്ഥാനം ഒഴിയണമെന്ന് ആവശ്യപ്പെടുന്നു.
മുന്‍ കോണ്‍ഗ്രസ് ഭരണകാലത്ത് സിദ്ധരാമയ്യ അഞ്ച് വര്‍ഷം മുഖ്യമന്ത്രിയായിരുന്നു. വീണ്ടും അധികാരത്തിലെത്തിയപ്പോള്‍ ഒന്നര വര്‍ഷമായി സിദ്ധരാമയ്യ മുഖ്യമന്ത്രിയായി തുടരുന്നുണ്ട്. ഇനി ഭരണം മാറണമെന്നും ഡികെ ശിവകുമാര്‍ മുഖ്യമന്ത്രിയാകണമെന്നുമാണ് ശിവഗംഗ പറയുന്നത്. അതേസമയം കൂടുതല്‍ ഉപമുഖ്യമന്ത്രിമാര്‍ വേണമെന്നും ഡികെ പക്ഷം ആവശ്യപ്പെടുന്നു.
ഇതോടൊപ്പം പിന്നോക്ക-ദളിത് വിഭാഗങ്ങളിലെ മന്ത്രിമാര്‍ ഉപമുഖ്യമന്ത്രി സ്ഥാനം ആവശ്യപ്പെടുന്നതും കോണ്‍ഗ്രസില്‍ പ്രതിസന്ധിയാകുന്നുണ്ട്. ഏഴ് മന്ത്രിമാര്‍ ഈ ആവശ്യവുമായി ഹൈക്കമാന്റിനെ സമീപിച്ചിട്ടുണ്ട്. എന്നാല്‍ മന്ത്രിമാരുടെ ആവശ്യത്തില്‍ ഡികെ ശിവകുമാറിന് അതൃപ്തിയുണ്ടെന്നാണ് പുറത്തുവരുന്ന റിപ്പോര്‍ട്ടുകള്‍.
