ബംഗാൾ മുഖ്യമന്ത്രി മമത ബാനർജിയുടെ പാർട്ടിയായ തൃണമൂൽ കോൺഗ്രസിൽ ചേർന്ന ഭാര്യയുമായുള്ള വിവാഹബന്ധം വേർപെടുത്തുമെന്ന് ബി.ജെ.പി, എം.പി. സുജാത മൊണ്ടാൽ ഖാനാണ് ഇന്ന് തൃണമൂലിൽ ചേർന്നത്. ബംഗാൾ നിയമസഭാ തിരഞ്ഞെടുപ്പിന് മുന്നോടിയായാണ് നീക്കം.
അതേസമയം രാഷ്ട്രീയം തന്റെ വൈവാഹിക ബന്ധം അവസാനിപ്പിച്ചതിനാൽ വിവാഹമോചന നോട്ടീസ് അയക്കുമെന്നാണ് സുജാതയുടെ ഭർത്താവും ബംഗാളിൽ നിന്നുള്ള എം.പിയുമായ സൗമിത്ര ഖാൻ പറയുന്നത്.
നേരത്തെ തൃണമൂലിലായിരുന്ന സൗമിത്ര ഖാൻ 2014- ൽ ബിഷ്ണുപൂർ നിയോജകമണ്ഡലത്തിൽ നിന്ന് എം.പിയായി വിജയിച്ചു. ബി.ജെ.പിയുടെ യുവജന വിഭാഗമായ യുവമോർച്ചയുടെ മേധാവിയുമാണ് ഇദ്ദേഹം. കഴിഞ്ഞ വർഷം നടന്ന പൊതുതിരഞ്ഞെടുപ്പ് സമയത്ത് ക്രിമിനൽ കേസിൽ ജാമ്യത്തിനുള്ള വ്യവസ്ഥയായി ബിഷ്ണുപൂരിലേക്ക് പ്രവേശിക്കുന്നതിൽ നിന്ന് കോടതി വിലക്കിയതിനെ തുടർന്ന് സൗമിത്ര ഖാന്റെ ഭാര്യ സുജാതയാണ് അദ്ദേഹത്തിന് വേണ്ടി പ്രചാരണം നടത്തുകയും വിജയത്തിലെത്തിക്കുകയും ചെയ്തത്.
സുജാത ഖാനും ബി.ജെ.പി അംഗമായിരുന്നു. പ്രധാനമന്ത്രി നരേന്ദ്രമോദിയുമായി പണ്ട് വേദി പങ്കിട്ടിട്ടുമുണ്ട്. ഭർത്താവിന്റെ വിജയം ഉറപ്പാക്കാൻ നിരവധി ത്യാഗങ്ങൾ എടുത്തിട്ടും തനിക്ക് അംഗീകാരം ലഭിച്ചില്ലെന്നാണ് സുജാത ഖാന്റെ പരാതി.
എന്ത് ചെയ്യണമെന്ന് സൗമിത്ര ഖാന് തീരുമാനിക്കാമെന്നും ഒരു ദിവസം അദ്ദേഹം കാര്യങ്ങളെല്ലാം തിരിച്ചറിയുമെന്ന് താൻ പ്രതീക്ഷിക്കുന്നുണ്ടെന്നും സുജാത ഖാൻ പറഞ്ഞു. ഒരു പക്ഷേ അദ്ദേഹം തൃണമൂലിൽ തിരിച്ചെത്തിയേക്കുമെന്നും സുജാത ഖാൻ പ്രത്യാശ പ്രകടിപ്പിച്ചു.