മകളെ കൊലപ്പെടുത്തിയ കേസിൽ ജീവപര്യന്തം തടവ് ശിക്ഷ അനുഭവിക്കുന്ന നാല് പ്രതികൾക്കും ജാമ്യം അനുവദിച്ചതിനെതിരെ മാധ്യമപ്രവർത്തക സൗമ്യ വിശ്വനാഥൻ്റെ അമ്മ സുപ്രീം കോടതിയെ സമീപിച്ചു. ഹർജി ജസ്റ്റിസുമാരായ ബേല എം ത്രിവേദി, പങ്കജ് മിത്തൽ എന്നിവരടങ്ങിയ സുപ്രീം കോടതി ബെഞ്ച് തിങ്കളാഴ്ച്ച പരിഗണിക്കും. കേസിലെ നാല് പ്രതികൾ നൽകിയ അപ്പീൽ പരിഗണിച്ചാണ് ദില്ലി ഹൈക്കോടതി ശിക്ഷാ വിധി സ്റ്റേ ചെയ്തത്. പ്രതികൾക്ക് ജാമ്യവും നൽകി.
2008 സെപ്റ്റംബർ 30 നാണ് ഹെഡ് ലെയിൻസ് ടുഡേയിൽ ജോലി ചെയ്തിരുന്ന സൗമ്യ വിശ്വനാഥ് കൊല്ലപ്പെട്ടത്. രാത്രി ഷിഫ്റ്റ് ജോലി കഴിഞ്ഞ് പതിവു പോലെ കാറിൽ വസന്ത് കുഞ്ചിലെ വീട്ടിലേക്ക് മടങ്ങുകയായിരുന്ന സൗമ്യയെ നെൽസൺ മൺഡേല റോഡിൽ വെച്ച് മോഷ്ടാക്കൾ തടഞ്ഞു. രക്ഷപ്പെടാൻ ശ്രമിക്കുന്നതിനിടെ വെടിയേറ്റതിനെ തുടർന്ന് സൗമ്യ കൊല്ലപ്പെടുകയായിരുന്നു.
കേസിൽ വിചാരണക്കോടതി പ്രതികൾക്ക് ജീവപര്യന്തം ശിക്ഷ വിധിച്ചിരുന്നു. ഇതിനെതിരെ പ്രതികൾ അപ്പീൽ നൽകി. തുടർന്നാണ് കോടതി പ്രതികളുടെ ശിക്ഷ റദ്ദ് ചെയ്തതും അവർക്ക് ജാമ്യം നൽകിയതും. ഇതിനെതിരെയാണ് സൗമ്യയുടെ അമ്മ അപ്പീൽ നൽകിയത്. അപ്പീൽ സുപ്രീംകോടതി പരിഗണിക്കും. അഭിഭാഷക മാലിനി പൊതുവാളാണ് സൌമ്യയുടെ അമ്മയ്ക്കായി അപ്പീൽ സമർപ്പിച്ചത്.
രവി കപൂർ, ബൽജീത് സിംഗ്, അമിത് ശുക്ല, അജയ് കുമാർ, അജയ് സേത്തി എന്നിവരാണ് കേസിലെ 5 പ്രതികൾ. 2009ൽ ഇവർ അറസ്റ്റിലായി. ഒന്നാം പ്രതി രവി കപൂർ, രണ്ടാം പ്രതി അമിത് ശുക്ല, മൂന്നാം പ്രതി ബൽജീത് മാലിക്ക്, നാലാം പ്രതി അജയ് കുമാർ എന്നിവർക്ക് വിചാരണക്കോടതി ജീവപര്യന്തം തടവ് ശിക്ഷയും പിഴയും വിധിച്ചിരുന്നു.
2023 നവംബർ 26-ന് പ്രത്യേക കോടതി രവി കപൂർ, അമിത് ശുക്ല, ബൽജീത് മാലിക്, അജയ് കുമാർ എന്നിവർക്ക് ഇന്ത്യൻ ശിക്ഷാ നിയമത്തിലെ സെക്ഷൻ 302 സെക്ഷൻ 3(1)(i) (i) എന്നിവ പ്രകാരം രണ്ട് ജീവപര്യന്തം ശിക്ഷ വിധിച്ചിരുന്നു. അഞ്ചാമത്തെ കുറ്റവാളി അജയ് സേഥിക്ക് ഐപിസി സെക്ഷൻ 411 പ്രകാരം മൂന്ന് വർഷത്തെ ലളിതമായ തടവ് ശിക്ഷ വിധിച്ചു. എന്നാൽ ഫെബ്രുവരി 12 ന് ഡൽഹി ഹൈക്കോടതി രവി കപൂർ, അമിത് ശുക്ല, ബൽജീത് സിംഗ് മാലിക്, അജയ് കുമാർ എന്നിവരുടെ ശിക്ഷ താൽക്കാലികമായി നിർത്തിവയ്ക്കുകയും അവരുടെ ശിക്ഷയും ശിക്ഷയും ചോദ്യം ചെയ്തുള്ള അപ്പീലുകൾ തീർപ്പാക്കുന്നതുവരെ ജാമ്യം അനുവദിക്കുകയും ചെയ്തു.