20 ആം ആദ്മി എംഎൽഎമാരെ അയോഗ്യരാക്കിയ നടപടിയെ ചോദ്യം ചെയ്തു സമർപ്പിച്ച ഹർജി ഡൽഹി ഹൈക്കോടതി ഡിവിഷൻ ബെഞ്ചിന് കൈമാറി. ജസ്റ്റീസ് വിഭു ബക്രുവിന്‍റെ സിംഗിൾ ബെഞ്ചാണ് ഹർജി ഡിവിഷൻ ബെഞ്ചിന് കൈമാറിയത്.
എംഎൽഎമാരെ അയോഗ്യരാക്കിയ നടപടി റദ്ദാക്കാൻ കൂട്ടാക്കാതിരുന്ന കോടതി ഡൽഹിയിൽ ഉടൻ ഉപതെരഞ്ഞെടുപ്പ് നടത്തരുതെന്ന് കഴിഞ്ഞ ദിവസം ഉത്തരവിട്ടിരുന്നു. കഴിഞ്ഞ ആഴ്ചയാണ് 20 എഎപി എംഎൽഎമാരെ തെരഞ്ഞെടുപ്പ് കമ്മീഷൻ അയോഗ്യരാക്കിയത്.
ഇരട്ടപ്പദവി വിഷയത്തില്‍ എംഎൽഎമാരെ അയോഗ്യരാക്കണമെന്ന ശിപാര്‍ശ രാഷ്ട്രപതി അംഗീകരിച്ചതിനു പിന്നാലെയായിരുന്നു കമ്മീഷന്‍റെ നടപടി. ചൊവ്വാഴ്ച ആക്ടിംഗ് ചീഫ് ജസ്റ്റീസ് ഡിവിഷൻ ബെഞ്ച് സംബന്ധിച്ച് തീരുമാനമെടുക്കും. ഹൈക്കോടതിയില്‍ നിന്ന് അനുകൂല വിധിയുണ്ടായില്ലെങ്കില്‍ സുപ്രീംകോടതിയെ സമീപിക്കാനും ആം ആദ്മി പാര്‍ട്ടിയിൽ നീക്കമുണ്ട്.