കുന്നത്തൂര്‍ എം.എല്‍.എ കോവൂര്‍ കുഞ്ഞുമോനെ വഴിയിൽ തടഞ്ഞ് യൂത്ത് കോണ്‍ഗ്രസ് പ്രവര്‍ത്തകരുടെ അസഭ്യവര്‍ഷവും ഉടുമുണ്ടുരിഞ്ഞുള്ള പ്രതിഷേധവും. ക്ഷീരോത്പാദക സഹകരണ സംഘത്തിന്റെ തറക്കല്ലിടല്‍ ചടങ്ങില്‍ പങ്കെടുത്ത് മടങ്ങിയ എം.എല്‍.എയുടെ വാഹനം തടഞ്ഞിനിര്‍ത്തി കരിങ്കൊടിയും കാണിച്ചു.
കോണ്‍ഗ്രസ്, യൂത്ത് കോണ്‍ഗ്രസ് പ്രവര്‍ത്തകരാണ് വാഹനം തടഞ്ഞുനിര്‍ത്തിയത്. പ്രവര്‍ത്തകരിലൊരാളാണ് മുണ്ടുരിഞ്ഞ് പ്രദര്‍ശിപ്പിച്ചത്. യു.ഡി.എഫുകാരുടെ മുണ്ട് നീക്കി നോക്കിയാൽ കാവി നിക്കർ കാണാമെന്ന എം.എൽ.എയുടെ നിയമസഭയിലെ അവിശ്വാസ പ്രമേയ ചര്‍ച്ചയിലെ പരാമർശത്തിനെതിരെയായിരുന്നു പ്രതിഷേധം. സംഭവത്തിൽ ശാസ്താംകോട്ട പൊലീസ് കേസെടുത്തു.
തന്റെ വീട്ടില്‍ സമരത്തിന് എത്തുകയും പൊതുപരിപാടികളില്‍ തടയുകയും വാഹനം ആക്രമിക്കുന്നതും ശരിയാണോയെന്ന് പ്രതിഷേധക്കാര്‍ ആലോചിക്കുന്നത് നന്നായിരിക്കുമെന്ന് കോവൂര്‍ കുഞ്ഞുമോന്‍ എം.എല്‍.എ പറഞ്ഞു.
അതേസമയം എംഎല്‍എക്കെതിരെയുള്ള പ്രതിഷേധം വരും ദിവസങ്ങളിലും തുടരുമെന്നാണ് കോണ്‍ഗ്രസ് നേതൃത്വത്തിന്റെ വിശദീകരണം.