ബിസിനസ്സുകാരന്റെ നഗ്ന ദൃശ്യങ്ങള്‍ പകര്‍ത്തി ഭീഷണിപ്പെടുത്തി ലക്ഷങ്ങള്‍ തട്ടിയ കേസില്‍ യുവതി അറസ്റ്റില്‍. കാക്കനാട് എന്‍ജിഒ ക്വാര്‍ട്ടേഴ്‌സിന് അടുത്ത് പാലച്ചുവട് എം.ഐആര്‍ ഫ്‌ളാറ്റില്‍ താമസിക്കുന്ന ഷിജിമോളാണ് അറസ്റ്റിലായത്. 38 ലക്ഷം രൂപയാണ് ഇവര്‍ തട്ടിയെടുത്തത്.
മലപ്പുറം സ്വദേശിയായ ബിസിനസുകാരനെയാണ് യുവതി കെണിയില്‍പ്പെടുത്തി തട്ടിപ്പിനിരയാക്കിയത്. തന്റെ സുഹൃത്ത് വഴിയാണ് യുവതി മലപ്പുറം സ്വദേശിയെ പരിചയപ്പെട്ടത്. കഴിഞ്ഞ സെപ്തംബറില്‍ ഷിജിയെ കാണാന്‍ കാക്കനാട് ഫ്‌ളാറ്റില്‍ എത്തിയ ഇയാള്‍ക്ക് കുടിക്കാന്‍ മയക്കു മരുന്ന് കലര്‍ത്തിയ പാനീയം നല്‍കുകയായിരുന്നു. പിന്നീട് ഇയാളുടെ ദൃശ്യങ്ങള്‍ പകര്‍ത്തി. ഈ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിപ്പിക്കുമെന്ന് ഭീഷണിപ്പെടുത്തി പല തവണയായി ബിസിനസുകാരനില്‍ നിന്ന് ലക്ഷങ്ങള്‍ തട്ടിയെടുത്തു.
38 ലക്ഷം വാങ്ങിയതിന് ശേഷവും വീണ്ടും വീണ്ടും പണം ആവശ്യപ്പെടാന്‍ തുടങ്ങിയതിനെ തുടര്‍ന്ന് ഇയാള്‍ പൊലീസില്‍ പരാതി നല്‍കുകയായിരുന്നു. വരാപ്പുഴ പെണ്‍വാണിഭ കേസിലും ഷിജിമോള്‍ പ്രതിയായിരുന്നു. സമാനമായ വേറെയും കേസുകളില്‍ ഇവര്‍ ഉള്‍പ്പെട്ടിട്ടുണ്ടോ എന്ന് പൊലീസ് അന്വേഷിക്കുകയാണ്.
