മുതിര്ന്ന മാധ്യമപ്രവര്ത്തകനും മലയാള മനോരമ മുന് അസിസ്റ്റന്റ് എഡിറ്ററുമായ സിബി കാട്ടാമ്പള്ളി (ജോര്ജ് തോമസ്, 63) അന്തരിച്ചു. പ്രസ് ക്ലബ് ഐജെടി ഡയറക്ടര് ആയിരുന്നു. രാവിലെ 11.30ന് കോസ്മോപൊളിറ്റന് ആശുപത്രിയിലായിരുന്നു അന്ത്യം. കേരള പത്രപ്രവര്ത്തക യൂണിയന് തിരുവനന്തപുരം ജില്ലാ പ്രസിഡന്റായിരുന്നു.
കേരള രാഷ്ട്രീയത്തില് കോളിളക്കമുണ്ടാക്കിയ, ഇടുക്കി ജില്ലയിലെ തങ്കമണിയില് പൊലീസ് നടത്തിയ അതിക്രമങ്ങള് പുറംലോകത്തെ അറിയിച്ചത് സിബി കാട്ടാമ്പള്ളിയാണ്. രാഷ്ട്രീയം, പരിസ്ഥിതി, കാലാവസ്ഥാ വ്യതിയാനം തുടങ്ങി വൈവിധ്യമാര്ന്ന വിഷയങ്ങളില് ശ്രദ്ധേയമായ നിരവധി റിപ്പോര്ട്ടുകള് അദ്ദേഹമെഴുതിയിട്ടുണ്ട്. ഗ്രാമീണ റിപ്പോര്ട്ടിങ്ങിനുള്ള സ്റ്റേറ്റ്സ്മാന് പുരസ്കാരം രണ്ട് തവണ നേടി.
അന്വേഷണാത്മക പത്രപ്രവര്ത്തനത്തിനുള്ള ലാഡ്ലി മീഡിയ ദേശീയ അവാര്ഡ്, ഫ്രാന്സിലെ ക്ലബ് ഓഫ് പ്രസ് ആന്ഡ് റിപ്പോര്ട്ടേഴ്സ് വിത്തൗട്ട് ബോര്ഡേഴ്സ് ഏര്പ്പെടുത്തിയ ഫ്രഞ്ച് ഫ്രീഡം പ്രൈസ് തുടങ്ങിയ പുരസ്കാരങ്ങള് നേടിയ അദ്ദേഹം യൂറോപ്യന് കമ്മിഷന്റെ ലൊറന്സോ നടാലി ഇന്റര്നാഷനല് പ്രൈസ് നേടിയ ഏക ദക്ഷിണേന്ത്യന് പത്രപ്രവര്ത്തകന്, സ്റ്റാന്ഫഡ് യൂണിവേഴ്സിറ്റിയും റോയിട്ടേഴ്സ് ഫൗണ്ടേഷനും ചേര്ന്നു നല്കുന്ന ജോണ് എസ്. നൈറ്റ് ഫെലോഷിപ്പ് നേടിയ കേരളത്തില്നിന്നുള്ള ഏക പത്രപ്രവര്ത്തകനായിരുന്നു അദേഹം.
ഭാര്യ: കൊച്ചുറാണി ജോര്ജ്. മക്കള്: അമ്മു ജോര്ജ് (അയര്ലന്ഡ്), തോമസ് ജോര്ജ്. മരുമകന്: അരുണ് പുളിക്കന്. സംസ്കാരം പിന്നീട്.