സോളാർ കേസുമായി ബന്ധപ്പെട്ട് പുറത്തുവരുന്ന വെളിപ്പെടുത്തലുകളോട് പ്രതികരിച്ച് വെള്ളാപ്പള്ളി നടേശൻ. കെബി ഗണേഷ് കുമാറിനെയും, തിരുവഞ്ചൂർ രാധാകൃഷ്ണനേയും അധിക്ഷേപിച്ചാണ് വെള്ളാപ്പള്ളിയിടെ പ്രതികരണം. സമ്പത്തിനോടും സ്ത്രീകളോടും ആസക്തിയുള്ള പകൽ മാന്യൻ എന്നാണ് വെള്ളാപ്പള്ളി നടേശൻ കെ ബി ഗണേഷ് കുമാറിനെ വിശേഷിപ്പിച്ചത്.
ഗണേഷിനെപ്പോലെ ഒരാളെ മന്ത്രിസഭയിൽ ഉൾപ്പെടുത്തിയാൽ ജനാധിപത്യത്തിന്റെ അപചയമായിരിക്കും.മാന്യനായിരുന്ന കലഞ്ഞൂര് മധുവിനെ ചവിട്ടിക്കളഞ്ഞിട്ട് ഗണേഷ് എന്എസ്എസില് കയറി ഇരിക്കുകയാണ്. അത് തിരിച്ചറിയാന് വൈകിയതില് എന്എസ്എസ് ദുഃഖിക്കും. വെള്ളാപ്പള്ളി പറഞ്ഞു.
ഗണേഷ് കുമാര് വൃത്തികെട്ടവനും അധികാരത്തിന് വേണ്ടി എന്തും ചെയ്യുന്നവനുമാണെന്നും ആരോപിച്ച വെള്ളാപ്പള്ളി മുൻ മന്ത്രി തിരുവഞ്ചൂർ രാധാകൃഷ്ണനെയും വിമർശിച്ചു. സോളറിലെ ഗൂഢാലോചന അന്വേഷിച്ചാല് കോണ്ഗ്രസ് നേതാക്കള് കുടുങ്ങും. അധികാരത്തിന് വേണ്ടി തിരുവഞ്ചൂര് കാണിച്ച തറവേലയാണെന്നും പുറത്ത് കാണുന്ന കറുപ്പ് തന്നെയാണ് ഉള്ളിലെന്നും വെള്ളാപ്പള്ളി പറഞ്ഞു.