കെഎസ്ആര്ടിസിയുടെ ബിസിനസ് ക്ലാസ് ബസ് അടുത്തയാഴ്ച മുതല് ഓടിത്തുടങ്ങും. വന്ദേഭാരത് ട്രെയിനിന് സമാനമായി ശുചിമുറിയും ഭക്ഷണവും കഫെറ്റീരിയയും പാന്ട്രിയുമുള്ള ആഡംബര ബസാണ് നിരത്തിലിറങ്ങുക. രണ്ട് കോടി രൂപ വിലയുള്ള രണ്ട് ബസുകൾ സർവീസ് നടത്തും. എയര്ഹോസ്റ്റ് മാതൃകയില് ബസ് ഹോസ്റ്റസ്’ ഉം ബസിലുണ്ടാകും.
പുലര്ച്ചെ 5.15ന് തിരുവനന്തപുരത്ത് നിന്ന് വന്ദേഭാരത് ട്രെയിന് പുറപ്പെട്ടതിന് പിന്നാലെ ബസ് കൊച്ചിക്ക് പുറപ്പെടും. അതേ സമയം തന്നെ എറണാകുളത്ത് നിന്ന് തിരുവനന്തപുരത്തേക്കും മറ്റൊരു ബിസിനസ് ക്ലാസ് യാത്ര തിരിക്കും. രാവിലെ 10ന് മുന്പ് എറണാകുളത്ത് എത്തുന്ന രീതിയിലാണ് ബസ് സര്വീസ് ഉണ്ടാവുക.
നിരക്കിൽ വ്യാത്യാസമുണ്ടായിരിക്കും. ഭക്ഷണത്തിനും മറ്റും പ്രത്യേകം പണം നല്കണം. തിരുവനന്തപുരത്ത് നിന്ന് പുറപ്പെടുന്ന ബസിന് കൊല്ലം, ആലപ്പുഴ എന്നിവിടങ്ങളില് മാത്രമാണ് സ്റ്റോപ്പുണ്ടാവുക. ടിക്കറ്റ് നേരത്തെ റിസര്വ് ചെയ്യാനുള്ള സൗകര്യമുണ്ടാകും. റിസര്വ് ചെയ്ത എല്ലാ യാത്രക്കാരും എറണാകുളത്തേക്കാണെങ്കില് കൊല്ലത്തും ആലപ്പുഴയിലും സ്റ്റോപ്പുണ്ടാകില്ല.