സ്വന്തം അനുജനു വേണ്ടി തിരുവനന്തപുരത്ത് സെക്രട്ടേറിയേറ്റിനു മുന്നില്‍ നിരാഹരസമരം നടത്തുന്ന നെയ്യാറ്റിന്‍കര സ്വദേശി ശ്രീജിത്തിനു നടന്‍ ടോവിനോ തോമസും. സെക്രട്ടറിയേറ്റ് പടിക്കല്‍ സമരം നടത്തുന്ന ശ്രീജിത്തുമായി ടോവിനോ സംസാരിച്ചു. അല്പ നേരം ടോവിനോ സമര മുഖത്ത് ചെലവഴിച്ചാണ് മടങ്ങിയത്.
രണ്ടര വര്‍ഷത്തില്‍ അധികമായി സ്വന്തം അനുജന്റെ മരണത്തിനു കാരണമായ പൊലുസകാര്‍ക്ക് എതിരെ നടപടി ആവശ്യപ്പെട്ട് സമരം നടത്തുന്ന ശ്രീജിത്തിനു വേണ്ടി ജസ്റ്റിസ് ഫോര്‍ ശ്രീജിത്ത് ഹാഷ് ടാഗിലൂടെ സൈബര്‍ ലോകം സമരം നടത്തുകയാണ്. സൈബര്‍ സമരം ശക്തമായതിന് പിന്നാലെയാണ് രാഷ്ട്രീയക്കാരും സെലബ്രിറ്റികളും ശ്രീജിത്തിനെ തേടി എത്തി തുടങ്ങിയത്.
ഇന്ന് രാവിലെ സ്ത്രീകളും യുവാക്കളും അടങ്ങുന്ന വന്‍ സംഘമാണ് തലനഗരിയിലെ ഭരണസിരാ കേന്ദ്രത്തില്‍ മുന്നില്‍ പ്രതിഷേധ പ്രകടനവുമായി എത്തിയത്.
ശ്രീജിത്തിന്റെ സഹോദരനെ ലോക്കപ്പില്‍ മര്‍ദ്ദിച്ച് കൊന്നതില്‍ കുറ്റക്കാരെന്നു കണ്ടെത്തിയ പൊലീസുകാര്‍ക്കെതിരെ നടപടി ആവശ്യപ്പെട്ടാണ് നിരാഹരം. പൊലീസ് ഉദ്യോഗസ്ഥന്റെ ബന്ധുവായ പെണ്‍കുട്ടിയെ സ്നേഹിച്ചതിന്റെ പേരിലായിരുന്നു ശ്രീജിവിനെ പൊലീസുകാര്‍ ലോക്കപ്പില്‍ വച്ച് മര്‍ദിച്ചു കൊന്നത്. സംഭവത്തില്‍ പൊലീസ് കംബ്ലൈന്റ് അതോറിറ്റി കുറ്റക്കാരെന്നു കണ്ടെത്തുകയും തുടരന്വേഷണത്തിനു ഉത്തരവിടുകയും ചെയ്തിട്ടും പൊലീസുകാര്‍ക്കു എതിരെ നടപടി ഉണ്ടായിട്ടില്ല. ഇതിനെ തുടര്‍ന്നാണ് നടപടി ആവശ്യപ്പെട്ട് ശ്രീജിത്ത് നിരാഹര സമരം ആരംഭിച്ചത്.
ചിത്രത്തിനു കടപ്പാട് മാതൃഭൂമി ഓണ്‍ലൈന്‍