ടൈറ്റാനിയം ജോലി തട്ടിപ്പ് കേസിലെ മുഖ്യ പ്രതി ശ്യാംലാല് കസ്റ്റഡിയില്. ഇന്ന് പുലര്ച്ചെയോടെയാണ് പ്രത്യേക അന്വേഷണ സംഘം ശ്യാംലാലിനെ പിടികൂടിയത്. ഉദ്യോഗാര്ഥികളെ ടൈറ്റാനിയത്തില് അഭിമുഖത്തിനായി എത്തിച്ചത് ശ്യാംലാല് ആണെന്ന് അന്വേഷണത്തില് കണ്ടെത്തിയിരുന്നു.
ടൈറ്റാനിയം ജോലി തട്ടിപ്പുമായി രജിസ്റ്റര് ചെയ്ത 14 കേസിലും പ്രതിയാണ് ശ്യാംലാല്. കഴിഞ്ഞ ദിവസം തട്ടിപ്പിന്റെ മുഖ്യ സൂത്രധാരനായ കമ്പനി ലീഗല് ഡിജിഎം ശശികുമാരന് തമ്പി ഉള്പ്പെടെയുള്ള നാല് പേര്ക്കൊപ്പം ശ്യാംലാല് കോടതിയില് മുന്കൂര് ജാമ്യാപേക്ഷ നല്കിയിരുന്നു.
എന്നാല് ഹര്ജി കോടതി ജനുവരി അഞ്ചിലേക്ക് മാറ്റി. പ്രതികളെ പിടികൂടാന് ലുക്ക് ഔട്ട് നോട്ടീസ് ഇറക്കാനും പൊലീസ് തീരുമാനിച്ചിരുന്നു. അതിനിടെയാണ് ശ്യാംലാല് പിടിയിലായത്. ട്രാവന്കൂര് ടൈറ്റാനിയത്തില് ജോലി വാഗ്ദാനം ചെയ്താണ് ശ്യാംലാല് നിരവധി പേരില് നിന്ന് പണം തട്ടിയത്.
കേസിലെ പ്രധാന ഇടനിലക്കാരി ദിവ്യ നായര്, ഇടനിലക്കാരന് അഭിലാഷ് എന്നിവരാണ് കേസില് നേരത്തെ പിടിയിലായ പ്രതികള്. ഇവര് പിടിയിലായതോടെ മറ്റ് പ്രതികള് ഒളിവില് പോകുകയായിരുന്നു. കേസിലെ മറ്റൊരു പ്രധാന പ്രതിയായ ടൈറ്റാനിയം ലീഗല് ഡിജിഎം ശശികുമാരന് തമ്പിയെ ഇതുവരെയും പിടികൂടാന് ആയില്ല.