ബംഗാള് ഉള്ക്കടലില് രൂപപെട്ട ന്യൂനമര്ദ്ദം അതിതീവ്ര ന്യൂനമര്ദ്ദമായി ശക്തി പ്രാപിച്ചതായി കേന്ദ്ര കാലാവസ്ഥ വകുപ്പ്. ഇതേ തുടര്ന്ന് വരും ദിവസങ്ങളില് കേരളത്തില് ഒറ്റപ്പെട്ട മഴയ്ക്ക് സാധ്യത ഉണ്ടെന്നാണ് കാലാവസ്ഥാ വകുപ്പ് മുന്നറിയിപ്പ് നല്കിയിരിക്കുന്നത്. ഉച്ചക്ക് രണ്ടു മണി മുതല് രാത്രി 10 മണിവരെയുള്ള സമയത്ത് ഇടിമിന്നലിനുള്ള സാധ്യത കൂടുതലാണെന്നും കാലാവസ്ഥാ വകുപ്പ് അറിയിച്ചു.
ഇന്ന് വൈകുന്നേരം വരെ വടക്ക് പടിഞ്ഞാറ് ദിശയില് സഞ്ചരിക്കുന്ന അതിതീവ്ര ന്യുനമര്ദ്ദം തുടര്ന്നുള്ള 36 മണിക്കൂറില് പടിഞ്ഞാറ്- തെക്ക്പടിഞ്ഞാറ് ദിശയില് സഞ്ചരിക്കും. തമിഴ്നാടിന്റെ വടക്കന് തീരത്തേക്ക് നീങ്ങാന് സാധ്യതയുണ്ടെന്നാണ് അറിയിപ്പ്. കേരള, കര്ണാടക, ലക്ഷദ്വീപ് തീരങ്ങളില് മത്സ്യബന്ധനത്തിന് നിലവില് തടസ്സമില്ല.
തെക്ക് പടിഞ്ഞാറന് ബംഗാള് ഉള്ക്കടല്, അതിനോട് ചേര്ന്നുള്ള മധ്യ പടിഞ്ഞാറന് ബംഗാള് ഉള്ക്കടല്, ഗള്ഫ് ഓഫ് മാന്നാര്, വടക്കന് തമിഴ്നാട് തീരം, പുതുച്ചേരി, തെക്കന് ആന്ധ്രപ്രദേശ് തീരം എന്നിവിടങ്ങളില് മണിക്കൂറില് 55 മുതല് 65 കിലോമീറ്റര് വരെ വേഗതയിലും ചില അവസരങ്ങളില് 75 കിലോമീറ്റര് വേഗതയിലും ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്.