കിളികൊല്ലൂരില് സഹോദരങ്ങളെ പോലീസ് മര്ദിച്ച സംഭവത്തില് സി സി ടി വി ദൃശ്യങ്ങള് പുറത്ത്. ആദ്യം റൈറ്റര് പ്രകാശ് ചന്ദ്രന് സൈനികനെ അടിക്കുകയായിരുന്നു. മുഖത്ത് അടിയേറ്റ സൈനികന് തിരിച്ചടിക്കുന്നതും ദൃശ്യങ്ങളിലുണ്ട്. അടിപിടിക്കിടെ ഇരുവരും നിലത്തുവീണു.
വിഷ്ണുവിന്റെ ഷര്ട്ട് എ എസ് ഐ പിടിച്ചുവലിക്കുന്നതും ദൃശ്യങ്ങളില് കാണാം. ഇതോടെ, പരാതിക്കാരന് ആക്രമിച്ചപ്പോള് എ എസ് ഐ മര്ദിച്ചെന്ന പോലീസ് വാദം പൊളിഞ്ഞു.
സൈനികനായ വിഷ്ണു, സഹോദരന് വിഘ്നേഷ് എന്നിവര്ക്കാണ് കിളികൊല്ലൂര് പൊലീസില്നിന്ന് ക്രൂര മര്ദനമേറ്റത്. കൈവിരലുകള് തല്ലി ഒടിച്ചെന്ന് സഹോദരങ്ങള് പറയുന്നു. പൊലീസുകാര്ക്കെതിരെ നീങ്ങിയാല് വീട്ടില് കഞ്ചാവ് കൊണ്ടുവെച്ച് പിടിപ്പിക്കുമെന്നും ഭീഷണിപ്പെടുത്തി. തുടര്ന്ന് ഇവര്ക്കെതിരെ കേസെടുത്ത് 12 ദിവസം റിമാന്ഡ് ചെയ്യുകയും ചെയ്തു.
എം.ഡി.എം.എ.യുമായി കരിക്കോട് ജങ്ഷനില്നിന്ന് നാലുപേരെ കിളികൊല്ലൂര് പൊലീസ് പിടികൂടിയിരുന്നു. ഇവരെ കാണാന് അനുവദിക്കാത്തതിനെത്തുടര്ന്ന് സുഹൃത്തുക്കളായ സൈനികനും സഹോദരനും സ്റ്റേഷനില് കടന്ന് പൊലീസുകാരനെ ആക്രമിച്ചു എന്നാണ് ഇവര്ക്കെതിരെയെടുത്ത കേസ്. സംഭവത്തില് പൊലീസ് നിസാര നടപടിയാണ് കുറ്റക്കാരായ ഉദ്യോഗസ്ഥര്ക്കെതിരെ സ്വീകരിച്ചതെന്ന് വിമര്ശനമുയര്ന്നിരുന്നു.