കൊല്ലം ജില്ലയിലെ പരവൂരില് വിദേശ വിനോദസഞ്ചാരികളെ ആക്രമിച്ച സംഭവത്തില് മൂന്ന് പേര് പിടിയിലായി. പരവൂര് സ്വദേശികളായ പ്രശാന്ത് , വിഷ്ണു, ശ്രീരാജ് എന്നിവരാണ് പൊലീസിന്റെ പിടിയിലായത്. പരവൂര് കായലില് കയാക്കിങ്ങ് പരിശീലനത്തിന് എത്തിയ റഷ്യന് വിനോദ സഞ്ചാരികള്ക്ക് നേരെയാണ് ആക്രമണം ഉണ്ടായത്.
മദ്യപിച്ചെത്തിയ സംഘം വിനോദ സഞ്ചാരികളുടെ വഞ്ചിക്ക് നേരെ കല്ലെറിഞ്ഞ് അപായപ്പെടുത്താന് ശ്രമിക്കുകയും അസഭ്യം പറയുകയും ചെയ്തു എന്നാണ് പരാതി. പരാതിയെ തുടര്ന്ന് പൊലീസ് അക്രമികള്ക്കെതിരെ കേസെടുത്തു. വധശ്രമം അന്യായമായി സംഘം ചേരല് ഉള്പ്പടെ അഞ്ച് വകുപ്പുകള് ചുമത്തിയാണ് കേസെടുത്തിരിക്കുന്നത്.
ആക്രമണത്തിന് പിന്നില് പത്ത് പേര് ഉണ്ടെന്നാണ് പൊലീസിന്റെ കണ്ടെത്തല്. സംഭവത്തിന് ശേഷം ഇവര് സഞ്ചരിച്ചിരുന്ന ബൈക്കുകള് ഉപേക്ഷിച്ച നിലയില് പൊലീസ് കണ്ടെത്തിയിരുന്നു. പിടിയിലായ പ്രതികളെ പരവൂര് കോടതിയില് ഹാജരാക്കി റിമാന്റ് ചെയ്തു.