സ്മാര്ട്ട് സിറ്റി എക്സ്പോ വേള്ഡ് കോണ്ഗ്രസില് കേരളത്തിന്റെ പ്രതിനിധിയായി തിരുവനന്തപുരം മേയര് ആര്യ രാജേന്ദ്രന്. സ്പെയിനിലെ ബാഴ്സലോണയില് നടക്കുന്ന സ്മാര്ട്ട് സിറ്റി എക്സ്പോ വേള്ഡ് കോണ്ഗ്രസില് നഗര വികസനത്തെ കുറിച്ചുള്ള ചര്ച്ചകളും എക്സ്പോയുമാണ് നടക്കുന്നത്. മന്ത്രി എംബി രാജേഷും പരിപാടിയില് പങ്കെടുക്കുന്നുണ്ട്.
അതിവേഗം നഗരവത്കരണം നടന്നുകൊണ്ടിരിക്കുന്ന സംസ്ഥാനമാണ് കേരളം. തിരുവനന്തപുരം നഗരത്തില് ഫലപ്രദമായ രീതിയില് വികസന പ്രവര്ത്തനങ്ങള് ഏറ്റെടുക്കുവാനും പുതിയ കാലത്തിന് അനുസൃതമായി നഗരവികസനം ആസൂത്രണം ചെയ്യാനും ഇവിടത്തെ ചര്ച്ചകളും എക്സ്പോയും ഗുണകരമാകുമെന്ന് മേയര് ആര്യ രാജേന്ദ്രന് ഫേസ്ബുക്കില് കുറിച്ചു.
അധികാരമേല്ക്കുമ്പോള് ഇന്ത്യയിലെ ഏറ്റവും പ്രായം കുറഞ്ഞ മേയര് ആയിരുന്നു ആര്യ. അടുത്തിടെ കുഞ്ഞുമായി തിരുവനന്തപുരം നഗരസഭ കാര്യാലയത്തിലെത്തി തന്റെ ജോലിയില് വ്യാപൃതയാകുന്ന ആര്യ രാജേന്ദ്രന്റെ ചിത്രങ്ങള് സാമൂഹ്യ മാധ്യമങ്ങളില് പ്രത്യക്ഷപ്പെട്ടത് ഏറെ ചര്ച്ചകള്ക്ക് കാരണമായിരുന്നു.