സംസ്ഥാനത്ത് കനത്ത മഴ തുടരുന്നതിനിടയിൽ സ്കൂള് തുറക്കുന്നത് നീട്ടണമെന്ന് ആവശ്യവുമായി സ്കൂള് മാനേജ്മെന്റ് അസോസിയേഷന്. മഴക്കെടുതി രൂക്ഷമായ സാഹചര്യത്തില് ഒരാഴ്ചത്തേക്ക് സ്കൂള് തുറക്കല് നീട്ടി വെക്കണമെന്നാണ് ആവശ്യം.
പലയിടങ്ങളിലും വിദ്യാലയങ്ങളിലേക്കുള്ള വഴികളില് വെള്ളക്കെട്ട് രൂപപ്പെട്ടിട്ടുണ്ട്. ഇത് അപകടങ്ങള്ക്ക് വഴി വെച്ചേക്കാം. ഇത് കൂടാതെ പല സ്കൂള് കെട്ടിടങ്ങളുടെ അറ്റകുറ്റപണികളും മഴ കാരണം പൂര്ത്തിയാക്കാന് സാധിച്ചിട്ടില്ല. ഈ സാഹചര്യങ്ങള് എല്ലാം കണക്കിലെടുത്ത് സ്കൂള് തുറക്കല് നീട്ടി വെക്കണമെന്നാണ് സ്കൂള് മാനേജ്മെന്റ് അസോസിയേഷൻ്റെ ആവശ്യം.
അതേസമയം, സംസ്ഥാനത്ത് അതി തീവ്ര മഴ തുടരുന്ന സാഹചര്യത്തിൽ പ്രളയ സാധ്യതാ മുന്നറിയിപ്പ് പുറപ്പെടുവിച്ചു. നദികളിൽ ജലനിരപ്പ് അപകടകരമായി ഉയരുന്ന സാഹചര്യത്തിലാണ് മുന്നറിയിപ്പ്. അച്ചൻകോവിൽ, മണിമല, ഉപ്പള നദികളിൽ ഓറഞ്ച് അലേർട്ട് പ്രഖ്യാപിച്ചിരിക്കുകയാണ്. കണ്ണൂർ പെരുമ്പ, കാസർഗോഡ് ചന്ദ്രഗിരി, ഷിറിയ നദികളിലും, കോട്ടയം മീനച്ചിലാറിലും മഞ്ഞ അലേർട്ട് നൽകിയിട്ടുണ്ട്.