പാലക്കാട് ജില്ലയിലെ മണ്ണാര്ക്കാട് അലനല്ലൂരില് സോഡാ കുപ്പി കൊണ്ട് അധ്യാപകനെ മര്ദ്ദിച്ച കേസില് പ്രതിയെ റിമാന്ഡ് ചെയ്തു. അലനല്ലൂര് വൊക്കേഷനല് ഹയര്സെക്കണ്ടറി സ്കൂളിലെ അധ്യാപകന് കെ.എ അബ്ദുള് മനാഫിനാണ് മര്ദ്ദനമേറ്റത്. പരിക്കേറ്റ അധ്യാപകന് ചികിത്സയിലാണ്.
സ്കൂളിലെ പൂര്വ്വ വിദ്യാര്ത്ഥിയായ നിസാമുദ്ദീന് സോഡാ കുപ്പികൊണ്ട് അധ്യാപകന്റെ തലയ്ക്ക് അടിക്കുകയായിരുന്നു. ബുധനാഴ്ച അലനല്ലൂര് ചന്തപ്പടിയില് വെച്ചായിരുന്നു സംഭവം. മര്ദ്ദനമേറ്റ് നിലത്തുവീണ അധ്യാപകനെ നാട്ടുകാരാണ് ആശുപത്രിയില് എത്തിച്ചത്.
സംഭവത്തില് പ്രതിയായ നിസാമുദ്ദീനെ പൊലീസ് വധശ്രമത്തിന് കേസെടുത്തു. 20 വയസുള്ള യുവാവ് ഹൈസ്കൂളില് പഠിക്കുമ്പോള് അധ്യാപകന് ശിക്ഷിച്ചിരുന്നു. ഇതേ തുടര്ന്നുള്ള വൈരാഗ്യമാണ് മര്ദ്ദനത്തിന് കാരണമെന്ന് പൊലീസ് പറഞ്ഞു. സംഭവത്തെ തുടര്ന്ന് പ്രദേശത്തെ അധ്യാപകര് പ്രതിഷേധ പ്രകടനം നടത്തി. പഠനകാലത്ത് അധ്യാപകന് ശിക്ഷിച്ചതില് വര്ഷങ്ങള്ക്ക് ശേഷം പ്രതികാരം നടത്തുന്നത് ഭയപ്പെടുത്തുന്ന സംഭവമാണെന്ന് അധ്യാപക ഐക്യവേദി പ്രവര്ത്തകര് പ്രതികരിച്ചു.