തിരുവനന്തപുരം: ലോകമെമ്പാടുമുള്ള മലയാളികൾക്ക് ഓണാശംസകളുമായി കോൺഗ്രസ് നേതാവ് രമേശ് ചെന്നിത്തല. ഏതൊക്കെ പ്രശ്നങ്ങൾ ഉടലെടുത്താലും മലയാളികളെ ഒന്നിപ്പിക്കുന്ന ആഘോഷമാണ് തിരുവോണം എന്ന് അദ്ദേഹം പറഞ്ഞു. സന്തോഷത്തിന്റെയും സമൃദ്ധിയുടെയും ഓണക്കാലം മലയാളി മനസുകളിൽ വീണ്ടും പൂക്കാലം വിരിയിക്കുകയാണെന്നും രമേശ് ചെന്നിത്തല ഫേസ്ബുക്ക് കുറിപ്പിൽ രേഖപ്പെടുത്തി.
രമേശ് ചെന്നിത്തലയുടെ ഓണാശംസ:
“മലയാളികള് ലോകത്തെ ഏറ്റവും ഭാഗ്യം ചെയ്ത ജനതയാണ്. ഏതു ഭൂഖണ്ഡത്തിലും അവരെ ഒരുമിപ്പിക്കാന് ഓണമുണ്ട്. നീതിമാനായ മാവേലിയുടെ കഥയുണ്ട്. എല്ലാരുമൊന്നുപോലെ ജീവിച്ച ഒരു നല്ല കാലത്തിന്റെ മിത്തുണ്ട്. സമൃദ്ധിയുടെയും സന്തോഷത്തിന്റെയും ആ ഓണക്കാലം മലയാളി മനസുകളില് വീണ്ടും പൂക്കാലം വിരിയിക്കുകയാണ്”
“ആസുരവും ആശയറ്റതുമായ ഇന്നിനപ്പുറം നീതിയുടെയും നന്മയുടെയും ആ കാലം മലയാളികളിലേക്ക് തിരിച്ചുവരിക തന്നെ ചെയ്യും. ലോകമെമ്പാടുമുള്ള എന്റെ പ്രിയപ്പെട്ട മലയാളികള്ക്ക് എന്റെ ഓണാശംസകള്” രമേശ് ചെന്നിത്തല കുറിച്ചു.