നിലമ്പൂര്‍ ഉപതിരഞ്ഞെടുപ്പിന് പിന്നാലെ പിവി അന്‍വറിന് അനുകൂല നിലപാടുമായി മുസ്ലീം ലീഗ്. അടുത്ത തിരഞ്ഞെടുപ്പിന് മുമ്പ് അന്‍വറിന്റെ പ്രവേശനം ചര്‍ച്ചയാകുമെന്നും അന്‍വര്‍ ഒരു ഫാക്ടര്‍ ആണെന്ന ബോധ്യം നിലമ്പൂര്‍ ഉപതിരഞ്ഞെടുപ്പില്‍ ഉണ്ടായിട്ടുണ്ടെന്നും ഇടി മുഹമ്മദ് ബഷീര്‍ പറഞ്ഞു.
യുഡിഎഫ് അടിത്തറ അടുത്ത തിരഞ്ഞെടുപ്പിന് മുന്‍പ് വിപുലമാക്കണം എന്നത് ന്യായമായ പൊളിറ്റിക്സ് ആണ്. സമാന ചിന്താഗതിക്കാരെ ഉള്‍പ്പെടുത്തേണ്ടത് ചര്‍ച്ചചെയ്യണം. അന്‍വര്‍ ഒരു ഫാക്ടര്‍ ആണെന്ന ബോധ്യം നിലമ്പൂര്‍ തിരഞ്ഞെടുപ്പില്‍ വന്നിട്ടുണ്ട്. അന്‍വര്‍ വോട്ടുപിടിച്ചല്ലോ. എല്ലാം പോസിറ്റീവ് ആയി കാണണമെന്നും ഇടി മുഹമ്മദ് ബഷീര്‍ പറഞ്ഞു.
തിരഞ്ഞെടുപ്പ് ആകുമ്പോഴേക്കും സ്വാഭാവികമായും കക്ഷി ബന്ധങ്ങളില്‍ അനുകൂലമായ മാറ്റം ഉണ്ടാകും. അത്തരം ചര്‍ച്ച ഉയര്‍ന്നുവരുന്ന ഘട്ടത്തില്‍ പിവി അന്‍വറിന്റെ പ്രവേശനം ഉള്‍പ്പെടെയുള്ള കാര്യം ചര്‍ച്ചയാവും അത് അനിവാര്യവുമാണ്. ലീഗ് എല്ലാ കാര്യത്തിലും മുന്‍കൈ എടുക്കാറുണ്ട്. നിലമ്പൂര്‍ തിരഞ്ഞെടുപ്പ് ഫലത്തിന്റെ അടിസ്ഥാനത്തില്‍വേണം ഇനി കാര്യങ്ങള്‍ വിലയിരുത്തേണ്ടതെന്നും ഇടി കൂട്ടിച്ചേര്‍ത്തു.
എല്‍ഡിഎഫില്‍ നിന്ന് പുറത്തുവന്ന ശേഷം പിവി അന്‍വര്‍ ലീഗ് നേതാക്കള്‍ ഉള്‍പ്പെടെയുള്ളവരുമായി നിരവധി ചര്‍ച്ചകള്‍ നടത്തിയിരുന്നു. രാഷ്ട്രീയ പ്രവേശനം സാധ്യമാകാതെ വന്നതോടെയായിരുന്നു അന്‍വര്‍ തൃണമൂല്‍ കോണ്‍ഗ്രസിലേക്ക് ചുവടുമാറ്റിയത്. മുസ്ലീം ലീഗിന്റെ അനുകൂല നിലപാട് അന്‍വറിന് പുതിയ സാധ്യതകളാണ് മുന്നോട്ടുവയ്ക്കുന്നത്.
