പാലക്കാട് ബിജെപി ജില്ലാ അധ്യക്ഷനായി ചുമതലയേറ്റ് പ്രശാന്ത് ശിവൻ. നേതാക്കൾ ഷാൾ അണിയിച്ചാണ് സ്ഥാനാരോഹണ ചടങ്ങ് നടത്തിയത്. അതേസമയം സ്ഥാനാരോഹണം ചടങ്ങിൽ ഇടഞ്ഞു നിൽക്കുന്നവർ എത്തിയില്ല. ആർഎസ്എസ് ഭീഷണിക്ക് കൗൺസിലർമാർ വഴങ്ങിയെങ്കിലും ചടങ്ങിൽ എത്തിയില്ല.
വൻ വിവാദങ്ങൾ പുകയുമ്പോഴാണ് യുവമോർച്ചാ ജില്ലാ അധ്യക്ഷൻ പ്രശാന്ത് ശിവൻ പാലക്കാട് ബിജെപിയിൽ പുതിയ ജില്ലാ അധ്യക്ഷനായി ചുതമലയേറ്റത്. നഗരസഭയിലെ വിമതവിഭാഗം കൗൺസിലേഴ്സ് പരിപാടിയിൽ നിന്ന് വിട്ടുനിന്നു. ബിജെപി ജനറൽ സെക്രട്ടറി സി കൃഷ്ണകുമാറിൻ്റെ നോമിനിയായ പ്രശാന്ത് ശിവനെ ജില്ലാ അധ്യക്ഷനായി ഏകപക്ഷീയമായി തെരഞ്ഞെടുത്തുവെന്ന് ചൂണ്ടിക്കാട്ടിയാണ് ഒരു വിഭാഗം ബിജെപി നേതാക്കൾ ഇടഞ്ഞുനിൽക്കുന്നത്.
നഗരസഭ ചെയർപേഴ്സൺ പ്രമീള ശശിധരൻ, വൈസ് ചെയർമാൻ ഇ കൃഷ്ണദാസ്, ആരോഗ്യ സ്റ്റാൻഡിങ് കമ്മിറ്റി ചെയർമാൻ സ്മിതേഷ്, വിദ്യാഭ്യാസ സ്റ്റാൻഡിങ് കമ്മിറ്റി ചെയർമാൻ സാബു, മുതിർന്ന അംഗം എൻ ശിവരാജൻ, കെ ലക്ഷ്മണൻ എന്നിവരുൾപ്പെടെയായിരുന്നു ഇടഞ്ഞ് നിന്നിരുന്നത്.